EDITORYAL - Kriminalidad bantayanan

Nagkadaghan na ang mga tunghaan nga gitugotang makapahigayon og limited face to face classes dinhi sa Sugbu. Nagpasabot kini nga daghan na sab mga kabataan nga makagawas-gawas sa kadalanan.

Ang peligro sa pandemiya sa Covid-19 seryuso, apan salamat sa bakuna. Daghan na sab mga tinun-an ang bakunado na karon batok sa maong sakit.

Dili pa hinuon kini 100 porsiyento, tungod kay pinili lamang ang mga tinun-ang gitugotang makabalik og linawas nga pagtungha sa ilang mga eskuylahan subay sa guidelines nga gipagawas sa DepEd.

Ang guidelines gibase gihapon sa mga guidelines sa health protocols mao nga limitado lamang ang gidaghanon sa mga tinun-an matag lawak saringan aron dili maghuot ug mabutang sa peligro ang mga tinun-an sa pagtakud-takod sa sakit.

Ang ilaha nalang mao ang pagseryuso sab sa pagsuot sa ilang mga facemask kun makigsagol sila sa ilang mga classmates o ba kaha atol sa ilang pagpadung ug pagpauli gikan sa eskuylahan.

Apan gawas sa maong sakit, duna pa say laing hulga sa mga tinun-an, kining mga kriminalidad nga bisan asa pwedeng mahitabo kun walay magbalantay.

Kay kun modaghan na gani ang mga tawo sa kadalanan, mao man sab ang mga bentahosong mga kawatan, esnatser, tulisan, mangunguot, budol-budol ug daghan pang nakalain-laing modus operandi sa mga kriminal. Ang kapolisan kinahanglang maghinayhinay na og shift ngadto sa anti-criminality campaign gikan sa pagka-tigpatuman sa mga health protocols ug sa bag-ohay lang nahuman nga eleksyon.

Kaning mga badlungon sa katilingban wala ni pilion, bisan bata kun duna silay makuhang dunay bili, ilaha kining buhaton. Busa kinahanglang magmatngon ang mga ginikanan para sa ilang mga anak.

Maayong awhagon ang kapolisan sa nagkadaiyang lugar nga magbutang gyud og mga polis sa mga crime prone areas. Sa pagkakaron, ang kaniadto crime prone areas posibleng dili na mao tungod sa nakalabay nga pandemiya.

Apan posible sab nga anha mobalik og burdo-burdo ang mga kiriwan og mga kamot ug ang uban kanila wala pa mailhi sa mga polis, busa maayong pangandaman kini.