Pahuway diha sa Ginoo

Nahinumdom Ko niadtong college pako. Ang among prefect kaniadto nga si Padre Eric Raveza III (RIP) sige gyud og pamuyag sa chapel labina kun makita niya ang seminarista nga makatulog panahon sa pag-ampo. Moingon gyud dayon to siya: “Sleeping Under God’s Wings!” Kay dili tuyoon nga makatulog ug makahinanok pa gyud. Kay lagi sleeping under God’s Wings.

Daghan kaayo kita og plano sa atong kinabuhi. Daghan kita og buot kab-oton ug labaw sa tanan daghan kita og buot mapakita.

Apan ning panahona karon nahimong idlas ang tinuod nga pahuway. Daghan kita og buot pamatud-an kuyog na niini ang tinguha nga mapakita nato ang atong kalig-on labina ning panahon sa dakong kalisdanan.

Atong nakita karon nga daghan sa atong mga gisaligan ang naneguro lang pud sa ilang kaugalingong katagbawan. Nahimong hanap ang gipaabot natong kausaban. Padayong natun-as ang tanan alang kanato. Unsaon naman lang niini nga padayong nahunlos ang gisaligan natong paglaum.

Mao nga kun buot hunahunaon buot na gyud natong mopahuway na lang diha sa Ginoo. Kay siya raman ang naghatag nato sa tanan nga atong gikinahanglan. Siya lamang paigo na gyud!

Matag gabii samtang gisud-ong ko ang mga mugna sa paningkamot sa tinguha nga makapangalagad sa uban, nakita nako ang akong kaugalingon nga gikapoy na ug nahutdan sa kusog ug kadasig. Si kinsa ba ang angyang basulon niini? Salamat sa mga gabii nga nahimong idlas ang paghikatulog.

Matud pa nakigsulti ang Ginoo kay basin baya ug kini lamang mga higayona nga duna koy panahon alang kaniya.

Sa dayon nakong piyong sa akong mga nagluya nga mga mata nanumbalik sa akong panumdoman kadtong awit nga I Love You Lord. Ang maong awit nagkanayon:

I Love you Lord and I lift my voice!

To worship you in my soul rejoice

Take joy my king, in what you hear,

Make me a sweet, sweet sound in your ears!