Birthday kilig...

Gikilig ang cast ug crew sa GMA7 sitcom nga Happy ToGether kang John Loyd Cruz ug sa taod-taod na nga gituohang ka relasyon niini nga si Isabel Santos nga usa ka artist.

Kini kay sa unang higayon nagpakita sa iyang sweetness si John Lloyd ngadto kang Isabel pinaagi sa paghawok sa aping niini.

Nasayran nga 39th birthday sa actor niadtong Biyernes, apan natunong nga may taping siya alang sa nahisgutan nga sitcom. Didto sab sa set si Isabel nga may dala nga birthday cake. Sa video ug mga hulagway nga gi-upload ni Jason Gainza sa Instagram mapahiyumon ang actor samtang gikantahan siya og happy birthday.

Paghuman niya og huyop sa birthday candle, dinhi na niya gihawkan si Isabel.

September 2021, pa ang huhungihong nga aduna silay relasyon. Sa mga IG post ni Isabel, usahay masigpatan si John Lloyd apan kanunay kining nagtalikod, usahay layo sa camera. Unang higayon kini nga ingon ani sila ka sikit ug ka sweet.

“Hanggang sa muli…”

Giklaro ni Robi Domingo nga dili siya mobiya sa Pinoy Big Brother, sukwahi sa interpretasyon sa uban nga panamilit sa hingpit na ang iyang post kabahin sa latest season sa maong reality show.Tweet post ni Robi niadtong Biyernes: “Ito na marahil ang edisyon kung saan ako pinakamaraming beses na umiyak, tumawa, at natuto. Sa lahat ng naging bahagi ng tahanan na ito, salamat sa tiwala, respeto, at pagmamahal. Magpakatotoo, magpakatao. Hanggang sa muli, Kuya. [blue and yellow emoji] @PBBabscbn” Suma pa ni Robi, mopahuway una ang PBB human sa taas-taas sab nga panahon nga naaninaw kini sa publiko. Niadto pang May 29, ang big night sa maong reality show, apan niadtong Biyernes subling nag-farewell  post si Robi.

Kini kay nilugwa na kagabii ang Idol Philippines nga maoy hulip sa PBB, ug diin si Robi maoy host.

Malisud ang hilak-hilak

Giangkon ni Ivana Alawi nga naglisud siya sa hinilakay nga esena sa iyang umaabot nga teleserye sa ABS-CBN nga The Family Affair. Kini kay malipayon man gyud siya nga matang sa pagkatawo.

Managsama man tuod sila sa iyang karakter nga si Cherry Red nga mahigugmaon sa pamilya, apan dakong hagit niya ang heavy drama scenes sa maong teleserye nga ugma na sa primetime molugwa isip hulip sa The Broken Marriage Vow.

Apan mapasalamaton siya sa production people, sa iyang directo,  nga wala gyud siya gi-pressure. Gidasig matud pa siya nga ihatag lang ang kutob sa makaya niya alang sa mas ika anindot pa sa maong teleserye diin upat ang iyang leading men nga sila si Sam Milby, Jameson Blake, Jake Ejercito ug Gerald Anderson.