CEBU, Philippines — Gironda sa mga otoridad ang upat ka mga lokasyon sa Bohol nga giingong nag-operate og romance crypto scam nga nakakawat na og 10 milyones ngadto sa 30 milyones dolyares gikan sa ilang mga biktima.
Nadakpan sa maong operasyon ang 31 ka mga Chinese nationals nga naaktohan gyud sa mga operatiba nga nakig-chat sa ilang mga biktima. Ang operasyon joint-operation sa mga sakop sa National Bureau of Investigation gikan sa kaulohan kauban ang mga sakop Presidential Anti Organized Crime Commission (PAOCC) niadtong Nobiyembre 10 ug 11.
Gihimo kini diha sa lungsod sa Dauis ug Panglao. Ang operasyon sa mga suspek anha gihimo sa second floor sa usa ka cottage sa usa ka resort ug ang uban pribadong mga balay.
Gilusad ang operasyon pinasikad sa cyber warrant gikan sa Regional Trial Court sa Lapu-Lapu City basi sa kompirmadong impormasyon nga nahipos sa mga otoridad nga nag-operate sila og scam hub maong mga lugar.
Sa interbyu kang NBI Director Melvin Matibag sa programang Ted Failon DJ Chacha sa True FM Livestream sa One PH kagahapon, gikompirmar niyang apil sa nadakpan ang Chinese national nga gituohan nilang maoy lider sa grupo.
Gihulagway ni Matibag nga makonsiderar na kini nga cross border crime tungod kay ang mga biktima sa mga suspek mga Pilipino, Amerikano ug Spanish nationals.
Makiglambigit sila sa mga otoridad sa laing mga nasud diin gapuyo kining mga biktima.
Basi sa gidak-on sa ilahang nakawat gikan sa mga biktima, nagtuo si Matibag nga dugay na kining nag-operate sa lugar.
Bukikion sa mga imbestigador ang tanang laptops, computers, cellphones, SIM packs, i-pads lakip ang mga transaction records nga nakuha sa mga lokasyon.
Matud pang Matibag, makig-koordinar sila sa Bureau of Immigration bahin sa mga record sa mga dinakpan. Ang uban daw nila nakasulod dinhi pinaagi sa tourist VISA apan nilapas na.
Gisusi pud kung konektado ang grupo sa scam hubs nga gironda pud didto sa Cambodia tungod kay dunay usa sa mga dinakpan nga nakuhaan og Cambodian driver’s license ug nakatrabaho kini sa scam hubs didto.
Gisubay pud sa NBI kung duna bay tulobagon ang mga tag-iya sa resort ug mga balay diin nag-operate ang mga suspek, lakip sab ang mga opisyal sa barangay ug LGU.
“We are continuing the investigation po kay we are looking at the participation ng iba pang personalities, baka po may kinalaman sila papangong nagkaroon ng ganitong operation dito,” matud pang Matibag sa interbyu sa maong programa.
Kasong kalapasan sa Anti-Financial Accounts Scamming Act. Cybercrime Law ug SIM Card Registration Act ang ipasaka batok sa mga suspek. —IBM (BANAT NEWS)