CEBU, Philippines — Gidakop sa National Bureau of Investigation-Cebu District Office (NBI-CEBDO) ang usa ka lalaki nga gireklamong nangilad human nagpaila kini nga taff sa nagkadaiyang ahensiya sa gobyerno ug nangolekta og kuwarta gikan sa mga indibidwal baylo sa pagtabang sa pagproseso sa medical assistance, scholarship ug piyansa sa mga persons deprived of liberty (PDLs).
Sa press conference niadtong Martes, Oktubre 20, 2026, giila ni NBI-CEBDO head Atty. Arnel Pura gipaila niya ang suspek nga si Christian De Asis, kinsa ubay-ubay ang nireklamo lakip na ang buhatan ni Mandaue City Rep. Emmarie “Lolypop” Ouano-Dizon.
Matud ni Pura, giingong nagpaila si De Asis nga staff sa opisina ni Ouano-Dizon, sa Department of Social Welfare and Development (DSWD), Department of Health (DOH) ug uban pang ahensiya sa gobyerno. Giingong gipasaligan niya ang mga biktima nga makatabang siya sa pagproseso sa mga transaksiyon ug pagpasayon sa pagkuha sa mga aplikante sa ayuda sa gobyerno.
Giakusahan usab si De Asis nga nangolekta og kuwarta gikan sa iyang mga biktima, kunohay para iyang pamelete ug mga bayranan sa pagproseso sa ilang mga hangyo. Gidakop si De Asis niadtong Oktubre 14, 2026, human mihangyo si Ouano-Dizon og tabang sa imbestigasyon kay gigamit ang iyang opisina.
Human sa pagdakop, upat pa ka mga reklamante ang mitungha ug nangayo og tabang sa NBI-CEBDO.
Duha sa mga giingong biktima ang niingon nga gigamit ni De Asis ang iyang kunohay awtoridad aron maproseso ang medical assistance, samtang ang laing duha miingon nga gipasaligan silang tabangan nga maproseso ang piyansa sa ilang mga kapamilya nga natanggong sa prisohan.
“Sige siya og dawat og kwarta, pero way resulta,” matud ni Pura.
Usa kanila ang gikataho nga nakahatag kang De Asis og kapin sa ?100,000 sugod pa atong Marso hangtod Abril ning tuiga para makapiyansa iyang anak nga gidakop sa Criminal Investigation and Detection Group (CIDG).
Matud pang Ochia gigamit ni De Asis ang mga litrato niini kauban si Sixth District Congresswoman Daphne Lagon aron makuha ang iyang pagsalig.
Matud ni Ochia, gikan Marso 24 hangtod Abril 13, 2026, nakadawat siya og mga mensahe gikan sa usa ka tawo nga nagpailang pulis nga nalambigit sa pagdakop sa iyang anak ug gihulgang dakpon nila og usab iyang anak kung di sila mohatag og kuwarta. Apan nasakpan nila nga cellphone number kadto ni De Asis ang nag-text.
“Paghiman-himan diay iyaha ra tong number, siya ra gihapon,” matod ni Ochia.
Sa laing bahin, miingon si Precious Torreta, political affairs assistant ni Ouano-Dizon niklaro nga walay mga middleman nga gi-empleyo ang opisina sa kongresista aron magproseso sa mga hangyo alang sa medical ug educational assistance.
Matud ni Pura, posibleng atubangon ni De Asis ang mga kasong estafa, paglapas sa mga balaod batok sa cybercrime ug paglapas sa Ease of Doing Business and Efficient Government Service Delivery Act. Si De Asis nangayo og pasaylo sa mga iyang mga biktima ug kang Ouano-Dizon. – IBM BANAT NEWS