CEBU, Philippines — Gitakda sa Department of Social Welfare and Development (DSWD)-7 ang sunod nga pagkuha sa food commodities alang sa mga benepisyaryo sa Walang Gutom Program sa Central Visayas gikan Septiyembre 18 hangtod Oktubre 9, 2026.
Moabot og 27,828 ka benepisyaryo sa tibuok rehiyon, lakip ang 22,985 sa Cebu ug 4,843 sa Bohol ang makadawat ani karon nga cycle para sa mga benepisaryong narehistro ubos sa Listahanan 3, o National Household Targeting System for Poverty Reduction (NHTS-PR), nga mao ray kwalipikadong makakuha sa ilang food commodities.
Matud sa DSWD-7 sa usa ka pamahayag, temporaryong gipahunong ang redemption alang sa mga panimalay nga naila pinaagi sa Community-Based Monitoring System (CBMS). Apan Gidasig ang mga benepisaryo nga mokontak sa ilang Community Engagement Coordinators (CECs), DSWD field staff, mga opisyal sa barangay o local government units (LGUs) alang sa impormasyon bahin sa iskedyul sa pagkuha sa ayuda para sa pagkaon.
Ang mga cardholder nga dili maoy mismong makakuha sa ilang food commodities sulod sa gitakdang panahon mahimong mo-otorisa sa laing hamtong nga miyembro sa panimalay aron ma-claim ang food package.
Apan kinahanglan silang magpakita og authorization letter nga gipirmahan sa cardholder, lakip ang gikinahanglang mga dokumento sa pagkaila. Adunay 42 ka partner retailers nga moserbisyo sa mga benepisyaryo atol sa redemption period, lakip ang 19 ka community-based organizations (CBOs) ug Sustainable Livelihood Program Associations (SLPAs).
Ang Walang Gutom Program gipatuman karon sa 90 ka local government units (LGUs) sa Central Visayas, diin 53 niini anaa sa Cebu ug 37 sa Bohol. (BANAT NEWS)