P2.1 milyong shabu nasakmit sa duha ka buy-bust operations

CEBU, Philippines — Kapin P4.1 milyones nga kantidad sa gituohang shabu ang nasakmit sa kapulisan sa duha ka managlahing buy-bust operation nga gipahigayon sa Dauis, Bohol ug Argao, Cebu niadtong Biyernes, Hulyo 17. Sa Dauis, Bohol, nadakpan sa hiniusang operasyon sa Provincial Intelligence Unit (PIU), Provincial Drug Enforcement Unit (PDEU), ug Dauis Municipal Police Station ang usa ka high-value individual (HVI) nga giila lamang sa alyas "Jose," 31, residente sa Guindulman, Bohol. Narekober gikan kaniya ang 551.1 gramos sa gituohang shabu nga adunay gibanabang kantidad nga P3.7 milyones, lakip ang buy-bust money, usa ka cellphone ug motorsiklo nga giingong gigamit sa iyang ilegal nga kalihokan.

Base sa imbestigasyon sa kapulisan, sukad pa sa 2014 giingong nalambigit ang suspetsado sa pagpamaligya og ilegal nga droga. Nadakpan usab siya kaniadtong 2016 tungod sa paglapas sa Republic Act 9165 ug nakagawas sa prisohan niadtong 2024.

Samtang sa Barangay Jampang, Argao, Cebu, duha usab ka lalaki ang nadakpan sa buy-bust operation nga gipahigayon sa Argao Municipal Police Station.

Ang mga suspetsado giila lamang sa mga alyas "Raymond," 29, nga maoy target sa operasyon, ug "Elmer," 20,  parehong taga Barangay Jampang.

Nasakmit gikan kanila ang 60 gramos sa gituohang shabu nga adunay gibanabang kantidad nga P408,000.

Matod sa kapulisan, unang higayon pa lamang nga nadakpan ang duha tungod sa paglapas sa Sections 5 ug 11 sa Republic Act 9165. Apan, nagtuo ang mga awtoridad nga adunay koneksyon ang mga suspetsado sa mga dagkong drug personalities nga anaa karon sa prisohan. (BANAT NEWS)