Wala na nakamata
CEBU, Philippines — Napalgan nga wala nay kinabuhi ang usa ka 71-anyos nga lalaking diha sa sidewalk sa Barangay Pari-an, Cebu City niadtong Miyerkules sa buntag Hulyo 8.
Giila ang namatay nga si Pablito Castillo Abella, 71, nagpuyo sa aseras diha sa eskina sa Sikatuna ug Bonifacio Streets sa Barangay Day-as.
Sumala sa Pari-an Police Station, nakadawat sila og tawag alang sa tabang alas 6:50 sa buntag human makabantay ang mga residente og baho gikan sa usa ka lalaki nga naghigda sa sidewalk. Sa pag-abot sa mga pulis, wala na kini kinabuhi.
Matud ni Patrolman Ronel Alqueza, walay nakita nga samad o timailhan nga adunay foul play sa lawas atol sa inisyal nga imbestigasyon.
Nasayran usab sa imbestigasyon nga ulahing nakita nga buhi ang biktima sa milabay’ng tungang gabii.
Usa ka tenant sa duol nga building ang nakakita kaniya nga natulog sa sidewalk ug nakamatikod pa nga naglihok-lihok pa kini niadtong mga orasa.
Sa pagkakaron, padayon pa ang kapolisan sa pagpangita ug pagpahibalo sa mga paryente niini.— IBM BANAT NEWS
- Latest
