Nabitik sa kable, patay

CEBU, Philippines — Nakabsan sa kinabuhi ang driver sa motorsiklo samtang angol ang angkas niini human sila mabitik sa mga kable nga niyungyong sa karsada gumikan sa kakusog sa uwan ug hangin sa National Highway, Barangay Balud, Lungsod sa San Fernando niadtong Biyernes sa gabii, Hunyo 13, 2025.

Ang driver sa motorsiklo mao si Sherwin Jan Arrojado Gempisao, 22 , taga Barangay Panadtaran ug angkas niya si Joanna Angel Mae Saguisabal Aringoy, 25, ang duha pulos taga Barangay Panadtaran, Lungsod sa San Fernando.

Ang San Fernando Municipal Police Station nakadawat og tawag nga nagpahibawo labot sa nahitabong aksidente sa maong barangay.

Niresponde dayon ang kapulisan ug sa ilang pag-abot sa nahitaboan ang mga biktima gidala na sa pinakaduol nga tambalanan sa MDRRMO San Fernando.

Base sa gihimong pakisusi sa kapulisan ang mga biktima nagbiyahe sa direksyon nga paingon sa Cebu City.

Pag-abot nila sa naasoy nga lugar natagak matud pa ang mga kable gikan sa poste tungod sa kakusog sa uwan ug hangin.

Wala nakabantay ang driver hinungdan nga nabitik sila niini ug nangatumba kay nawagtangan og balanse.

Matud pa nalagpot ang driver sa motorsiklo ug naigo kini og laing sakyanan nga gasunod nila.

Ang duha ka mga biktima gidala sa South General Hospital sa dakbayan sa Naga apan ang driver gideklarar nga dead on arrival sa nag-atiman nga doktor samtang ang angkas padayong nagpaalim didto.

Padayon ang imbestigasyon sa kapulisan sa Lungsod sa San Fernando sa maong insidente. — /IBM (BANAT NEWS)