Siyam ka kahon sa pinabuthang isda nakompiska

CEBU, Philippines — Siyam ka kahon nga adunay sulod nga mga isda ang nakompiska atol sa gipahigayong market denial operation diha sa dalan C. Padilla, Dakbayan sa Sugbo niadtong Mayo 15, 2015.

Ang nagpahigayon sa maong operasyon mao ang Bureau of Fisheries and Aquatic Resources, Department of Veterinary Medicine and Fisheries, Cebu City Transportation Office ug Cebu City Police Office.

Lain-laing nga klase sa isda ang nakompiska diin kasagaran niini mga mamsa.

Ang mga kinahon nga isda nibalor ngadto P72,000 ug gikatahong gigamitan kini og dinamita sa pagpanguha niini.

Nikabat ngadto sa P360,000 ang kinatibuk-ang multa sa nakahimo og kalapasan apan aduna kini 30 porsyento nga diskwento sa unang paglapas diin P252,000 na lang ang bayaran nga multa.

Si Dr. Alice Utlang sa DVMF nibutyag nga kagahapon sa buntag nibayad na sa kinatibuk-ang kantidad sa multa ang pahinante ug ang drayber mao nga gi-release na usab ang truck nga gikargahan sa mga isda.  BDB BANAT NEWS