Nalambigit sa vote buying gikasohan
CEBU, Philippines — Gipasakaan og kaso ang usa ka tawo nga nadakpan sa akto sa kapolisan nga nangisyu og ilegal nga numero sa swertres ug gialegar nga nakuhaan usab og sobre nga adunay sulod nga P1,000 nga gikatahong gikan sa kandidato nga naghatag niini.
Si Atty. Francisco Pobe, direktor sa Comelec-7 nagkanayon nga gipasakaan og kaso ang nalambigit sa vote buying sa Lungsod sa Cordova.
Matud ni Pobe nga ang dakong kantidad sa kwarta nga nasakmit sa mga tinugyanan sa Mactan Cebu International Airport ang gituohan usab nga gamiton sa pagpamalit og boto sa usa ka politio dinhi sa Sugbo.
Ug ang kaatbang nga kandidato mao ang niduso og kaso batok sa kaatbang diin gilegar sa mga testigo nga sila nakadawat og kwarta gikan sa maong kandidato nga gireklamo.
Samtang sa Siyudad sa Mandaue ang nadakpan nga si “Rolando”, 20-anyos ang gipasakaan usab og kaso sa kapolisan human makuha gikan kaniya ang sobre nga adunay sulod nga P1,000 diin adunay pangalan niini sa kandidato.
Gialegar sa suspetsado nga gikan sa lider sa usa ka politiko ang maong kwarta nga giestepliran og sticker sa politiko nga naghatag niini.
Sa homily sa pari sa Archdiocesan Shrine sa Our Lady of Fatima sa Basak, Siyudad sa Mandaue niadtong Domingo iyang gihisgotan ang paghinakotay sa mga tawo gikan sa compound sa ilang simbahan gikan sa ala 1:00 sa Sabado sa hapon hangtud sa alas 9:00 sa gabii.
Matud sa maong pari nga ang maong mga tawo ang gipasakay og bus ug gidala sa Barangay Labogon tungod kay gikatahong adto didto ipahigayon ang paghinatagay. Dugang sa pari nga wala mananghid ang nagpasiugda ngadto kanila ug natingala na lang sila sa kadaghan sa mga tawo hinungdan nga ilaha kining gisusi. (BANAT NEWS)
- Latest
