Garcia gipasakaan disqualification case

CEBU, Philippines — Lain na pung kaso ang gisang-at batok kang Cebu City Mayor Raymond Alvin Garcia, ning higayona, petition for disqualification ngadto sa Commission on Elections sa kauluhan.

Ang nipasaka sa kaso mao ang usa ka Analiza Pilunes Maglasang nga taga Cadahu-an, Barangay Talamban kinsa nipasangil nga ang mayor nipagawas ang naulahi og kwarta alang sa medical aid ug lakip na pagpangapud-apod og ayuda atol sa panahon sa pagpangampanya.

“Incumbent officials tend to use the people’s own money to promote their own candidacy… Instead of the people’s voting for the more competent officials, the people’s minds get hijacked by unscrupulous officials who only ensure that the people see them work just months into the elections,” suwat sa prefatory statement ni Maglasang.

Kini mialegar nga nangapud og bugas ngadto sa taga Barangay Duljo Fatima ug nipagawas og tabang pinansyal ngadto sa 50 ka mga indibidwal pinaagi sa Cebu City Hospitalization Assistance and Medicines Program (CHAMP), pagpanghatag og ambulansya sa bukirang barangay.

Dugang pa nga nikatap pud sa Facebook nga gigamit ang mga monoblock chairs ug pipila ka mga sakyanan  sa  siyudad atol sa pulong-pulong.

Ang 24 ka pahina nga petition for disqualification nga gisang-at ni Maglasang wala pa madawat sa buhatan sa mayor apan nikatap na kini sa social media. Sa pagpakighinabi kang Garcia kini miingon nga wala siya makaila sa reklamante apan ang iyang tan-aw aduna kini bulok politika gikan sa iyang mga kaatbang nga mga partido.

“Propaganda ra na nila oy. It is a desperate move finding ways to pull me down. These are all politically motivated kay pila nalang ka adlaw sa eleksyon and we have been very careful in implementing programs that do not violate the election laws,” suma pa ni Garcia kinsa giulan og mga kaso sa nanglabay nga mga adlaw nga tanan gipang-dismiss sa Ombudsman.

“This is very desperate attempt to discredit my candidacy,” dugang pa ni Garcia.

Giklaro niya ang mga nahitabong pagpagawas og pundo alang sa mga social services ug mga proyekto nga bag-uhay lang gi-implementar nagsubay kini base sa exemption sa election ban nga na-aprubahan sa COMELEC.  IBM BANAT NEWS