Rider nalatayan sa tanker
CEBU, Philippines — Patay ang usa ka delivery rider human kini nalatayan og fuel tanker nga nagsunod kaniya diha sa eskina Uldog St. sa Cebu South Coastal Road (CSCR) sa Barangay Cansojong, Syudad sa Talisay kagahapon sa buntag.
Ang namatay mao si Joseph Basabe Sedano, 46 anyos nga taga Barangay Vito, lungsod sa Minglanilla.
Samtang ang drayber sa fuel tanker mao si Castillo Jayco Mata, 34 anyos nga taga Binaliw, Syudad sa Danao.
Sa imbestigasyon sa City of Talisay-Traffic Operation Development Authority (CT-TODA) naghunong ang biktima sakay sa iyang motorsiklo tungod kay stop ang signal.
Paingon ang biktima sa habagatan samtang ang fuel tanker mao sab ang padulngan. Sa dihang ni green na ang signal sa traffic light wala dayon maka abante ang motorsiklo.
Ang fuel tanker nga naa sa iyang likod miabante na diretso ug nadumbolan ang biktima kinsa natumba ug napasok kini sa ilawom ug nalatayan sa ligid.
Gidala sa tambalanan ang biktima apan gideklarar kini nga dead on arrival.
Ang drayber sa fuel tanker naa na sa kustodiya sa kapolisan nagpaabot nga pasakaan og kaso. IBM BANAT NEWS
- Latest
