Gun-for-hire nataymingan sa Oplan Hipos

CEBU, Philippines — Nadakpan sa kapulisan sa Mambaling Police Station 11 Cebu City Police ang usa ka giingong ex-convict ug miyembro sa gun-for-hire diha sa Sitio Puntod Alaska, Barangay Mambaling, siyudad sa Sugbo, Lunes sa gabie, Pebrero 17, 2025.

Ang dinakpan mao si Jimson Abas Tañeza, 40 anyos,  molopyo sa naasoy nga dapit.

Ang kapulisan sa Mambaling Police Station 11 nagpahigayon og patrolya sa dapit subay na sa pagpatuman nila sa Oplan Hipos dihang ang suspetsado naaktuhan nga dunay kalibre .38 revolver nga dunay duha ka bala  ug napulo ka medium size nga paketeng gituohang shabu nga nitimbang og 46.7 grams ug nagkantidad og P317, 560.

Ang suspetsado gikatahong miangkon nga nakapatay na kini og  tulo ka tawo didto sa Calatrava, Negros Oriental tungod sa away sa yuta pipila ka tuig na ang nakalabay.  Mga paryente ra sab matod pa niya ang iyahang mga napatay.

Kasong kalapasan sa Republic Act 10591, Republic Act 9165 ug COMELEC Gun ban ang ipasaka batok sa suspetsado.-- Romeo D. Marantal, IBM  BANAT NEWS