Mipusil sa babaye, napatay

CEBU, Philippines — Patay ang usa ka lalaking gidudahang nalambigit sa illegal drug trade human kini namusil og usa ka babaye, apan napusilan sab kini ug napatay sa mga polis nga nangita kaniya kagahapon sa kaadlawon.

Ang insidente nahitabo pasado alas 3 sa kaadlawon, Marso 14, 2024 diha sa Alaska Proper, Barangay Mambaling, siyudad sa Sugbo.

Matud pa sa kapolisan, una niini, usa ka Niña Cathrina Borja, residente sa naasoy nga lugar ang  gipusil ni Emmanuel Dinoy, 22. Ang duha managsilingan sa lugar.

Matud ni Police Major Jonathan Bethoveen Taneo, hepe sa Mambaling Police Station naalaan nga asset ang biktima sa dapit maong giinitan kini sa suspetsado kinsa nalambigit sa illegal nga drugas.

Nakakuha sab og impormasyon ang kapulisan nga ang biktima nakadawat na og hulga sa kinabuhi.

Sa wala pa gipusil ang biktima nagtambay kini sa kompyuteran sa dihang naagi ang suspetsado ug gipusil kini. Matud pa naigo sa ulo.

Gumikan kay daling nakaresponde ang kapulisan ug nadala dayon sa tambalanan ang biktima ug nakatug-an pa kini kung kinsa ang nagpusil kaniya.

Giadto dayon sa kapulisan ang lugar nga nahimutangan sa suspek apan pag-abot sa kapulisan sa lugar,  giingong nagpabuto og una sa iyahang armas ang suspek.

Walay laing nahimo ang mga polis, mibawos apan miresulta sa kamatayon sa suspetsado.

“Pagsulod pa lang sa tropa nagkupot na siya sa pusil mao to iyahang gipabuthan atong kapulisan mao to ni return fire atong kapulisan namatay ang suspek,” sigon ni Taneo.

Gidala pa sa kapulisan ang suspetsado sa tambalanan apan gideklarar kini sa doktor nga dead on arrival.

Padayon nga gisubay sa kapulisan kun nalambigit ba sa ubang krimen ang suspetsado. — IBM BANAT NEWS