Ex-con gitipi

CEBU, Philippines — Nagbuy-od ug naligo sa kaugalingong dugo ang usa ka 30 anyos nga lalaking giingong sud-gawas sa prisohan human kini gipusil sa wala pa mailhing mamumuno diha sa Katipunan Street, Barangay Labangon, siyudad sa Sugbo pasado alas 9 sa gabii sa adlaw’ng Miyerkules.

Nailhan sa lugar ang biktima nga si Niño Dignos Dacuba, residente sa Sitio Callejon, Barangay Labangon ning siyudad.

Sa imbestigasyon sa Labangon Police Station 10 pinangulohan ni Police Major Angelito Valleser nagbarog daplin sa karsada ang biktima kay kini parking attendant sa maong dapit.

Matud pa dunay wala mailhing lalaki nga nagsuot og kolor blue nga t-shirt, itom nga pantalon nga miabot ug mipaduol sa biktima ug kalit gipusil kaduha ang biktima ug daling misibat.

Si Valleser miingon nga sulod- gawas na sa prisuhan ang biktima ug gani nakombikto kini sa tulo ka kaso sa pagpanulis, duha sa pagpangawat ug duha sa illegal nga sugal.

Daghan matud pa mga silingan niini ang naglagot kaniya kay giingong wala’y gipili nga biktimahon.

Ang mga mga kaniadto kaso sa biktima maoy gisubay sa mga imbestigador nga posibleng maoy motibo nganong kini gipatay.

“Badlongon kaayo. Wala pili biktimahon. Sulod ug gawas prisohan. Dali ra kagawas kay mo plead quilty dayon,” matud ni Valleser.

Nagtuo ang kapulisan nga .38 nga revolver ang gigamit sa pagpusil patay sa biktima sanglit wala’y kabhang nga nakit-an sa crime scene.  Padayon sab ang pagpangita sa kapulisan sa suspek sa krimen. (BANAT NEWS)