CEBU, Philippines — Nakiglambigit karon ang kapolisan sa Lapu-Lapu City Police Office (LCPO) sa buhatan sa Technical Education and Skills Development Authority (TESDA) alang sa pagpaubos sa skills training program sa mga drug surrenderees nga gitawag karon og Anti-Illegal Drug Advocates o AIDA.
Si Police Colonel Elmer Lim, director sa LCPO miingon nga alang sa unang hugna sa ipaubos sa skills training program sa TESDA mao ang ilang100 ka AIDA's nga gipili gikan sa lima ka mga police station.
Ipaubos sila sa higpit nga mga pagsulay alang sa hingpit nga pagbag-o sa ilang kinabuhi ug apil na niini ang pagpaubos sa unom ka bulan nga community drug rehabilitation program nga gipasiugdahan sa lokal nga kagamhanan ug pagpaubos kanila sa random drug test.
Si Lim miingon nga human sa ilang skills training sa TESDA ang maong mga AIDA's hatagan og certification aron ilang magamit sa pagsulod og trabaho.
Naglakip sa mga skills nga ilang pagatun-an sa TESDA mao ang driving, electrical installation and maintenance, Organic Agriculture production, welding ug uban pa.
Gipaniguro ni Lim nga ang maong mga drug advocate nga napaubos sa skills training program sigurado nga makasulod og trabaho human sa ilang graduation.
Kini tungod kay ang mga kompaniya o establisamento nga ilang gikalambigit maoy mohatag ug mopasulod kanila og trabaho. (BANAT NEWS)