CEBU, Philippines — Giawhag sa Konseho sa Siyudad sa Sugbo ang opisyales sa Barangay Inayawan; Cogon, Pardo, Basak, Pardo; Basak, San Nicholas; Mambaling; Duljo-Fatima ug Sawang Calero nga mopasiugda og mga coastal clean-up operations.
Kini aron mahimong hamugaway ang agianan sa tubig ubos sa ilang hurisdiksyon, kaning maong tubig nga sagol tubig sa dagat nag-uwang kini sa mainland sa dakbayan ug South Road Properties.
Kaning nahisgutang katubigan mao ang ilang orihinal nga baybayon sa wala pa ang reclamation sa SRP, gipabilin kining abli ug masudlan og tubig sa dagat matag motaob aron dunay maagian ang mga lokal nga mananagat padung sa Mactan Channel.
Kani nga baybayon nagagikan sa Sawang Calero padung ngadto sa Inayawan ang kataposang barangay sa Cebu City sa habagatan. Ang nahisgutang mga coastal barangay natabunan sa SRP apan pinaagi niining gibiling gamay nga kaagian sa tubig sa dagat mahimo rang makagawas padung sa Mactan Channel ang mga gagmay’ng sakayan ug pumpboats didto sa habig sa DPWH sa utlanan sa Cebu City ug Talisay City ug ingon man sa SRP Bantayanan sa Hari tower sa Sawang-Calero.
Apan sa pagkakaron pwerte ning bahoa ug hugaw tungod sa mga basura nga nangalubong na sa lapok.
Plano kini karon himuong atraksyon sa mga turista.
Ang maong sugyot kay gipasiugdahan ni Konsehal Jocelyn Pesquera pinaagi sa usa ka resolusyon nga gipapeobahan dayon sa konseho dili pa lang dugay.
Nipadangat usab sila og request ngadto sa Bantay Dagat Commission aron motabang og bantay sa area sa pagseguro nga walay mo- encroach sa channel ilabi na duna kini dakong potensyal sa turismo.
Matud pa niya nga dako gyud og matabang ang kabaranggayan ug ubang stakeholders aron makab-ot ang maong tinguha.
“The channel between the Cebu mainland and the SRP has a very good potential to be developed for a boat cruise; however, we need the cooperation of all the coastal barangays especially in cleaning it up,” suma pa ni Pesquera.
Sa pagbisita ni Pesquera sa pipila ka dapit sa Europe , nakita gyud niya kun unsa kanindot ang boat cruises nga ang agian mga kanal lamang.
“ In other countries, waterways are very important and played significant role in terms of transportation of goods and passengers and even in terms of tourism,” niya pa.
Ang sikat nga Siyudad sa Venice sa amihanang-silangang bahin sa nasud sa Italya nga gilangkoban og 118 ka gagmay nga mga sila nga konektado og mga gagmay nga mga taytayan, bugtong agianan sa mga tawo ang katubigan niini gamit ang mga giadornohang bangka ug gagmay nga speedboats.
Kun maumol dinhi sa dakbayan ang boat cruise, nagtuo si Pesquera nga makatabang kini sa pagpalambo sa tourism industry sa siyudad ug daghang mga tawo aning coastal barangays ang mabulahan.
“Once the boat cruise will materialize, it will be a big boost to our tourism industry and not to mention the economic benefit will generate for the people in the coastal barangays,” matud pa niya.— IBM (BANATNEWS)