CEBU, Philippines — Dili mominos sa 65 ka pamilya nga biktima sa bagyong Odette sa lungsod sa Argao ang nakadawat ug Transitional Shelters, niadtong Lunes.
Kini ang gibutyag ni Fr. Alden John Baran, Program Director sa Cebu Caritas Inc.
Matud pa ni Baran, ang turn-over sa Bahay Caritas Shelter Homes gihimo sa San Isidro Labrado Parish, sa Argao.
Dugang pa ni Baran, ang mga nakadawat sa maong panimalay kadtong mga apektado sa bagyong Odette nga gikan sa Barangay Cansuje, Alambijud, Ubaub, Calagasan ug Conalum nga puros sakop sa lungsod sa Argao.
Sumala pa ni Baran, kabahin lang kini sa relief and rehabilitation program sa Cebu Caritas Inc ngadto sa mga biktima sa bagyong Odette.
Gawas sa panimalay nakadawat usab ug livelihood program ang mga tawo ilabi na sa mga lugar nga naapektohan sa bagyo.
Ang Cebu Caritas Inc padayon karon sa ilang pagpaambit sa mga tabang pinaagi usab sa pagmontar ug mga Parish Caritas aron kadtong gikan sa lain nga lugar dili na kinahanglan moari sa siyudad aron makapangayo ug tabang. — MEL (BANATNEWS)