CEBU, Philippines — Midangop sa Highway Patrol Group (HPG)-7 ang usa ka babaye human nga dili niini ma-renew ang rehistro sa iyang sakyanan diha sa Land Transportation Office (LTO)-7 kay aduna nay laing nagparehistro niini gamit iyang rehistro ug plaka.
Si Cecille Labang, miingon nga karong tuiga siya magpa-renew sa rehistro sa iyang sakyanan nga napalit diha sa C. Padilla, apan nakurat siya kay dili ma-renew kay giingong narehistro na ang plaka sa sakyanan niini apan sa lain.
“Sa first year pagpalit nako wala’y problema, we only found out nga naay naka-clone pag-renew na this year, mao na naka-hold karon akong sakyanan wala na kadagan,” ni Labang pa.
Na-trace sa mga otoridad ang nanag-iya sa laing sakyanan apan kini nangangkon nga biktima sab siya niini kay wala siyay kasayoran nga cloned diay tanang dokumento sa iyang gipalit.
“Iyaha ang original unya wala ko kahibawo sa unsay nahitabo kay pag-receive nako ana naa nay rehistro ba, so, diretso nako,” matud sa lalake kansang plaka sa sakyanan kay clone.
Gipakita ni Police Col. Niel Francia, hepe sa HPG-7 ang duha ka sakyanan nga naka-park sa atubangan nga bahin sa buhatan sa HPG-7 nga kun tan-awon wala gyuy kalainan.
Wala’y problema kung pareho og sakyanan apan dakong kalapasan kun kaluha og plaka ug rehistro.
Sigon ni Francia mahulog kini sa gitawag og “technical carnapping.” Sama kini anang sa rentahan nga sakyanan unya dad-on sa laing dapit ug ipalusot ang pagparehistro. Giimbestigar na sa HPG ang hitabo ilabi na ang dealer niini. (BANATNEWS)