CEBU, Philippines — Si Bam Adebayo mipatuasik og 31 puntos uban ang 10 ka rebounds samtang si Jimmy Butler midugang og 26 puntos sa dihang gibuntog sa Miami Heat ang Los Angeles Clippers, 115-110, sa NBA kagahapon didto sa FTX Arena sa Miami, Florida.
Nagparamdam sab sila si Tyler Herro ug Caleb Martin nga nagkumboya'g 36 puntos alang sa Heat nga nagkupot na karon og 11-14 nga baraha. Si Paul George miwadwad og 29 puntos, walo ka rebounds, ug pito ka assists samtang si Reggie Jackson mitali og 20 puntos alang sa Clippers nga nahagsa sa 14-12.
Wala hinoon gipaduwa sa Clippers ang bitoon nilang si Kawhi Leonard aron makapahuway ang tandugonon niining tuhod.
Sa habig sa Heat, wala makapakita'g aksiyon si Kyle Lowry sa labing unang higayon ning season gumikan kay gituyo og papahuway ni coach Erik Spoelstra.