CEBU, Philippines — Gitinguha karon sa kagamhanan sa Siyudad sa Mandaue ang pagpatukod og stationary housing alang sa mga pamilya nga biktima sa sunog sa sitio Paradise sa Barangay Looc sa Siyudad sa Mandaue.
Suma pa ni Atty John Eddu Ibañez, executive secretary ni Mayor Jonas Cortes nga giplano nga adto tukoron ang stationary housing sa bakanting luna nga nahimutang duol sa Cebu International Convention Center sa reclamation area.
Ang tukoron nga housing maoy temporaryo nga puy-an sa mga biktima sa sunog samtang gipaabot pa nga mahuman ang kaugmaran sa housing project sa Department of Human Settlement and Urban Development (DHSUD) sa nasudnong kagamhanan.
Gitug-an ni Atty Ibañez nga sa pagkakaron ang ilang gihimo mao ang pagpakigsabot sa usa ka pribadong kompaniya nga maoy nag-abang sa 400 ka ektaryang luna nga gipanag-iya sa kagamhanan sa siyudad.
Sa maong gidak-on sa bakanteng luna posible nga masulod na ang 700 ka pamilya nga biktima sa sunog nga temporaryong gipahiluna sa evacuation center.
Una niini si Mayor Cortes nipirma og memorandum of understanding MOU uban sa mga opisyal sa DHSUD alang sa katukoran sa 14,000 nga mga housing unit sa Siyudad sa Mandaue.
Samtang gipahibawo sa mayor kagahapon nga makadawat na sa ilang financial assistance ang mga nasunogan sa sitio Paradise, Barangay Looc.
Matud pa ni Cortes, ang financial assistance way labot sa Aid to Individuals in Crisis Situation kon AICS nga gipang-apod-apod sa mga opisyal sa nasudnong kagamhanan. Si Camilo Basaca Jr, ang pangulo sa City Social Welfare and Services nitug-an nga naka validate na sila ug dili mominos sa 670 ka pamilya o 2,678 ka tawo.
Ang nanag-iya og balay makadawat ug P10 mil samtang ang mga renters ug boarder makadawat ug 5mil ka pesos. —Romeo T. Limpangog (BANATNEWS)