CEBU, Philippines — Nakadawat og P5,000 nga pasiunang pinansiyal nga hinabang ang mga biktima sa sunog sa Sitio Paradise sa B arangay Looc sa Siyudad sa Mandaue.
Ang maong salapi nga ilang nadawat nga gihatag niadtong miaging adlaw ang gibahin nila ni Senador Bong Revilla ug Mayor Jonas Cortes.
Gikuyogan ni Cortes si Senador Revilla sa pagbisita sa evacuation center sa mga biktima sa sunog diin gihimo niini ang paghatag sa pinansiyal nga tabang nga tag P3,000 matag pamilya.
Gipahibalo ni Cortes nga modugang kini og P2,000 aron P5,000 nga pinansiyhal ang madawat sa mga biktima.
Matud pa ni Cortes sa iyang pamahayag nga ang maong kantidad magamit sa uban pa nga panginahanglan sa mga bikktma.
Dugang pahibalo ni Cortes nga gisugdan na ang pagproseso sa paghatag og tag P10,000 nga pinansyal nga ayuda gikan sa panudlanang lokal sa siyudad alang sa matag pamilyang nasunogan.
Gawas sa pinansiyal nga tabang gihatagan na sab ang mga nasunogan og grocery packs nga adunay lima ka kilong bugas.