CEBU, Philippines — Gitinguha karon sa kagamhanan sa Siyudad sa Mandaue ang paghawan na sa mga panimalay sa kabarangayan nga makalapas sa three meter easement zone area sa Butuanon River.
Paglikay kini nga masubli pa ang nasinati nga pagbaha niadtong Septiyembre 9, 2022 nga diin daghang kabalayan ang nahunob sa tubig baha pagsuyla sa maong sapa tungod sa pagbunok sa uwan.
Si Mandaue City Housing and Urban Development Office (HUDO) Project Coordinator Vincent Guy Aquino miingon nga sa kinatibuk-an nilang pag-ihap sa maapektahan sa clearing operation 1,074 ka mga balay naa sa sud sa 3- meter easement zone sa maong sapa.
Si Aquino miingon nga niadto pang Septiyembre napadad-an na og notisya ang mga tagbalay nga sila papahawaon kay peligro ang ilang nahimutangan.
Giproseso na sab ang pinansiyal nga ayuda sa mga naepektohan nga pamilya nga nagkantidad og P19mil ngadto sa P20 mil matag panimalay.
Unahon sa pagguba ang 127 ka mga balay sa Sitio Lub-ang sa, Barangay Casuntingan apan wala pa matakda kun kanus-a kini himuon.
Gibutyag ni Aquino nga naglakip sa mga balay nga maapil sa pagguba sa forced clearing operation ang 50 ka balay sa Sitio Torel ug laing 60 usab niini sa Sitio Tren- Tren sa Barangay Tingub.
Samtang 43 usab ka mga balay Sitio Paloma ug 37 usa sa Sitio San Miguel sa Barangay Maguikay, sa duha ka mga Sitio Almers, 97 ka balay ug upat usab ka mga balay sa Sitio San Vicente Ferrer sa Barangay Tabok ang panggub-on.
Sa Umapad nga gilangkoban sa mga nga naglakip sa Camansi, Monggos, Berhin sa Regla, Carrot ug Kangkong maoy maapil sa pagguba ang 179 ka mga balay niini
Maapil usab sa pagguba ang mga panimalay sa Sitio Tambis nga adunay 129 ka mga balay, laing 128 sa Dumpsite sa Barangay Umapad.
Samtang sa mga sitio sa Paknaan nga naglakip sa Mangrove adunay 124 ka mga balay ang malakip sa pagguba ug 72 usab ka mga balay sa Pulang Bukid sa Alang-Alang ug 56 usab ka mga balay sa Sitio Liong sa mao gihapon nga barangay sa Alang-Alang. — /IBM (BANAT NEWS)