CEBU, Philippines — Mipahigayon sa ilang lapad nga kampanya kagahapon alang sa pagprotektar sa kalikopan ang pipila ka bikers sa walo ka nasud nga sama sa Pilipinas, Indonesia, Vietnam, Japan, Bangladesh, India, Pakistan ug Nepal. Ang maong kalihokan gitawag og Pedal for People and Planet ug usa sa mga area niini kagahapon mao ang siyudad sa Sugbo.
Pipila ka grupo dinhi sa Sugbo ang nanawagan sa gobyerno nga kinahanglan nga moumol kini og pamaagi nga dili makadaot sa kalikopan ilabi na kun maghisgot og renewable energy.
Gisupak sa mga bikers ug pipila ka grupo mao ang waste to energy (WTE) incinerator project sa Kagamhanan sa siyudad sa Sugbo ug ang gisugyot nga 300 MW Liquefied Natural Gas (LNG) power plant.
Matud pa sa maong grupo nga dili gyud makaluwas sa planeta ang maong mga proyekto.
“While we are in the midst of a climate crisis, putting up projects that emit greenhouse gases and release toxics through air and ash that even the Environmental Management Bureau (EMB) will have a hard time monitoring will push us to climate catastrophe,” nagkanayon si Lito Vasquez, APMDD campaign coordinator dinhi sa Sugbo.
Nakita sa maong grupo ang posibilidad nga nakalapas ang WTE project sa RA 9003 (Ecological Solid Waste Management Act of 2000) ug RA 8749 (Philippine Clean Air Act).
Una niini ang Kagamhanan sa Siyudad sa Sugbo nitataw nga ang WTE project usa sa ilang mga pamaagi sa paghatag og solusyon sa problema niini sa basura.
Nagpinirmahay sa miaging buwan ang kagamhanan sa Siyudad sa Sugbo ug New Sky Energy Philippines, Inc. sa joint venture agreement (JVA) alang sa pag-umol sa siyudad og waste-to-energy (WTE) facility. Gitataw sa kagamhanan nga gawas sa pagmentinar sa kalimpiyo sa siyudad makabaton usab kini og share kun bahin sa kita sa maong pasilidad.
Kun adunay laing taga local government units nga molabay sa maong WTE facility adunay singko porysento ang siyudad gikan sa bayad sa laing lugar. MEL (BANATNEWS)