LCP ni-monitor sa mga apektado sa bagyo; Gullas saludo sa lima ka rescuer

CEBU, Philippines — Gibutyag ni Cebu City Mayor Michael Rama nga gipa-monitor niya sa iyang mga staff sa League of Cities of the Philippines (LCP) ang mga lugar didto sa kaulohan nga naapektohan sa bagyong Karding. Tumong niini nga makakuha og assessment report sa mga kadaot nga nahatag sa bagyo sa maong dapit.

Ang resulta sa assessment maoy magsilbing basehanan sa mga miyembro sa LCP sa tabang nga ilang gikinahanglan nga ipadangat ngadto sa mga apektado sa bagyo.

Si Rama mokuha usab kini og dugang mga update gikan sa kalihim sa Department of Interior and Local Government (DILG)  Benhur Abalos.

Subay niini, si Mayor Gerald Anthony “Samsam” Gullas Jr. sa Siyudad sa Talisay nipadayag sa iyang pagsaludo ngadto sa lima ka rescuer kinsa nibuhis sa ilang kinabuhi alang sa pagtabang sa nagkinahanglan.

Ang lima ka rescuer ni-rescue unta kini sa mga tawo kinsa nangayo og tabang tungod kay natanggong sila sa baha gumikan sa bagyong Karding didto sa Bulacan. Apan ang maong mga rescuer nangaanod kini sa baha ug nangalumos.

Matud ni Gullas nga didto nasukod ang ilang katakus ug makita ang ka risgo sa ilang trabaho diin lisod ang pagsungasong sa kalamidad apan ang maong mga rescuer nirisgo sa ilang kaugalingon aron pagtubag sa mga tawo nga nangayo og tabang.

Nihangyo si Gullas sa tanan nga iampo ang mga nitaliwan ug ang mga apektado sa  bagyo.

Sa laing bahin, padayon nga gi-monitor sa kapolisan sa Dakbayan saTalisay uban ang City Disaster Risk Reduction and Management Offic ang kadagatan sa siyudad samtang nasinati ang kusog nga bawod.

Giingong ang maong dagko nga bawod gumikan sa hinungaw sa bagyong Karding ug sa habagat.

Si Talisay City Councilor Danny Caballero, chairman sa committee on resiliency sa konseho sa siyudad nagkanayon nga kong adunay dili maayong panahon pasidan-an dayon nila ang mga residente diha sa kabukiran, kadagatan ug kasapaan nga magmabinantayon kanunay  diin padayon usab sila nga naglibot diha sa kabarangayan aron pahinumduman ang mga residente sa mga buhaton niini panahon sa kalamidad. Gabriel C. Bonjoc/BDB (BANATNEWS)