CEBU, Philippines — Wala damha sa usa ka maguuma sa bukirang barangay sa Cebu City nga pinaagi lang sa pagpabakuna kontra coronavirus disease makaangkon siya og P1.8 million nga house and lot.
Ang maong maguuma mao ang 59-anyos nga si Armando Patalinghug Semblante, taga Sitio Sitio Cabanbanan sa barangay Sirao, Cebu City.
Kaning iyang pagkadaug maisip nga “once-in-a-lifetime chance” aron makaangkon og susamang premyo.
Ang maong maguuma maoy nabunotan sa Bakuna Bonanza-I sa Cebu City gikan sa 600 mil nga nagpabakuna. Ang tanang nagpabakuna sa siyudad otomatikong maapil sa maong pa raffle.
Sama sa gihimong sa ubang mga local government units sa Pilipinas, ang Cebu City naghimo og nagkalain-laing pakulo aron maagni ug ganahan ang mga tawo nga boluntaryong magpabakuna kontra Covid-19.
Kahinumdoman nga bisan sa gidalang peligro ug kahasol sa pandemiya sa kinabuhi sa mga Pilipino sud sa nakalabay nga tuig sa 2020 pagsugod niini hangtud 2021 dihang gisugdan na ang pagpamakuna, naglisod ang gobiyerno pagkombinsir sa mga tawo nga magpabakuna kontra Covid-19.
Usa si Semblante sa mga tawong matud pa nagduhaduha sa pagbakuna tungod sa mga walay basihan ug mga sayop nga impormasyon batok sa bakuna ilabi na sa mga giingong ‘side effects’ niini.
Kung dili pa tungod sa iyang mga pag-umangkon nga namugos kaniya nga magpabakuna kay dunay papremyo sa Bakuna Bonanza, hayan wala siya makadaog karon. Ang iyang mga pag-umangkon pa maoy migalgal kaniya padung sa vaccination site.
“Akong mga pag-umangkon niingon pabakuna yo kay naay premyo. Ingon ko, ‘hayahaya gud, naay premyo?’ Mao ‘to, nagpabakuna ko,” matud pang Semblante kinsa ulitawo pa gihapon.
Nabunotan ang pangalan ni Semblante atol sa raffle sa grand prize sa Bakuna Bonanza nga gihimo niadtong gisaulog ang Charter Day niadtong Pebrero ning tuiga.
Human sa pila ka bulang pagkalangay, ang house-and-lot gikan sa DECA Homes sa Dumlog, Talisay opisyal ng gitunol kang Semblante gikan mismo ni Cebu City Mayor Michael Rama ug Vanessa Anne Anselmo, branch manager sa 8990 Holdings Incorporated.
Si Sembalante mapasalamaton kaayo sa grasya nga iyang nadawat kay karon dili na siya matulog og balay nga daghang buslot ang atop ug magtulo kun mouwan.
Gawas sa house and lot, gihatagan sab siya og bonus nga motorsiklo aron iyang magamit nga “service” pagsaka sa bukid sa Sirao diin siya nananom og saging nga maoy iyahang gitutokan human siya napakyas sa gugma.
Ang iyang abot adto niya direktang gitumod sa Carbon Public Market.
Si Armando miawhag sab karon sa ubang nagduhaduha pa gihapon sa pagpabakuna nga magpabakuna na.
Plano karon sa siyudad nga magpahigayon og laing pa raffle sa mga magpabakuna nga pagatawgong Bakuna Extravaganza.
“Kamong wa pa magpabakuna, pabakuna na mo. Naa man diay premyo. Basin sa sunod kamo nay makadaug. Magpasalamat ko ni Mayor Mike Rama nga nakadaug ko sa papremyo nga Bonanza,” matud ni Armando.— IBM (BANATNEWS)