RFID sa CCLEX higpit nang ipatuman sunod buwan
CEBU, Philippines — Sugod karong Oktubre 1, 2022 ipatuman na ang " full electronic toll payments system sa Cebu Cordova Link Expressway (CCLEX).
Kini nagpasabot nga ang mga nahibilin nga CCLEX cash lanes i-convert na ngadto sa exclusive RFID lanes.
Adunay 10 toll lanes ang CCLEX, ang upat niini maoy temporaryong lane nga modawat og cash alang sa wala pa kakuha og RFID. “Our transition to full contactless toll payment is aimed at providing a more efficient expressway experience to our road users and afford them ease of travel,” matud pa ni Cebu Cordova Link Expressway Corporation (CCLEC) President & General Manager Allan G. Alfon.
Gidasig karon sa CCLEC ang mga motorista nga adunay nay RFID nga i-reload ang ilang mga account online pinaagi sa MPT DriveHub, usa ka all-in-one nga application alang sa maong katuyoan. Alang sa mga motorista nga naggamit gihapon og cash lane, giawhag sila nga mobalhin na sa RFID alang sa mas paspas ug hapsay nga biyahe sa taytayan. Gawas sa MPT DriveHub app, mahimo usab nga i-reload sa mga motorista ang ilang CCLEX RFID sa CCLEX Customer Service Centers sa Toll Plaza. Abli kini gikan sa alas 6 sa buntag hangtod sa alas 9 sa gabii, Lunes hangtod Sabado sa tibuok bulan sa Septiyembre 2022. Sa mga wala pay RFID, mahimo silang mag-schedule sa ilang installation pinaagi sa pag-adto sa cclex.com.ph , libre kini nga makuha ug kinahanglan lang nga mag-load niini aron maoy kuhaan matag agi sa CCLEX. —IBM (BANATNEWS)
- Latest
