CEBU, Philippines — Patay ang usa ka babaye nga miambak sa Marcelo Fernan Bridge sa habig nga bahin sa Pajara sa Barangay Umapad sa Siyudad sa Mandaue alas 11 pasado kagahapon Martes sa buntag.
Si Police Staff Sergeant Ronnie Badios sa Presinto 5 sa Mandaue City Police Office (MCPO) miingon nga usa ka lalaki nga nagpailang ig-agaw maoy miila sa maong namatay nga mao si Cheryl Baring, 39, nga taga Barangay Casili sa Lungsod sa Consolacion.
Matud pa ni Badios nga ang mga sakop sa medical team sa City Disaster Risk Reduction and Management Office ang dali unta nga midala maong babaye sa tambalanan apan nakabsan gayod kini sa iyang kinabuhi.
Si Badios miingon nga wala pa nila masuta kun nganong naabot sa lugar ang babaye ug kun unsay hinungdan nga milayat kini. —IBM (BANATNEWS)