CEBU, Philippines — Hingpit na nga nahawan ang tampi sa Kaninalumsan River sa Cebu City ug karon gitrabaho na ang pagpalawom ug pagpalapad sa naasoy nga sapa aron dili na daling moawas panahon sa tingulan.
Matud sa Operations Head sa Cebu City Disaster Risk Reduction and Management Office(CCDRRMO) Harold Alcontin nahuman na og tangtang sa mga estraktura sulod sa 3-meter easement zone sa bahin sa maong sapa tunga-tunga sa mga taytayan sa Spolarium ug C. Padilla.
Sigon ni Alcontin nga gisugdan na ang pagkabkab sa yuta nga maoy hinungdan nigamay ang gilapdon sa agianan sa tubig sa maong sapa.
Kahinumduman niadtogn Hulyo 27 naapil pagkaanod ang usa ka kalalake human gibanlas ang ilahang panimalay diha sa Kinalumsan tungod sa kusog nga bul-og sa tubig nga resulta sa kakusog sa uwan ug na-rescue kini didto sa South Road Properties(SRP) Torre.
Hinungdan nga gimando ni Mayor Michael Rama sa CCDRRMO ang pagpa demolish sa mga kabalayan ug estraktura sulod sa 3-meter easement zone sa mga kasapaan sa dakbayan ug gipahiklin ang mga naapektahan sa mas luwas nga lugar
Kun mahuman na unya ang pagpalawom ug pagpalapad sa Kinalumsan, isunod sa CCDRRMO sa paghawan ang mga tampi sa sapa sa Lahug ug uban pang mga kasapaan sa siyudad. (BANAT NEWS)