CEBU, Philippines — Susihon sa konseho sa Dakbayan sa Talisay ang sitwasyon sa pagpangandam sa face-to-face classes nga gikatakdang buksan karong buwan sa Agosto niining tuiga.
Si konsehal Eduardo “Digul” Gullas III, chairman sa committee on education nagkanayon nga iyang kumustahon ang engineering department kong asa na kining dapita sa ilang paghinlo sa mga tunghaan nga naguba sa bagyong Odette.
Ubay-ubay ang tunghaan sa siyudad nga nagusbat sa bagyo apan gipaspasan kini nila sa pag-ayo ubos sa kamandoan ni Mayor Gerald Anthony “Samsam” Gullas Jr..
Matud pa sa batan-ong konsehal nga kong mahimo mahuman-human na ang mga tunghaan sa mas labing dali nga panahon.
Nagkanayon si Gullas nga mas maayo nga mabalik na gyud ang face-to-face classes aron adunay daghan pa nga makat-onan ang mga kabataan.
Sa pagkakaron, si Gullas nagkanayon nga anaa pa siya sa pagsubay sa mga gikinahanglan sa mga magtutudlo aron iyaha kining mahatagan og tabang. —/BDB (BANAT NEWS)