CEBU, Philippines — Patay ang usa ka 7-anyos nga batang babaye kinsa gituohang nalumos sa baha diha sa Sitio Cadigay, Barangay Cantabaco, Dakbayan sa Toledo niadtong Miyerkules sa gabii.
Ang namata mao si Ashley Mahinay, reisdente sa maong lugar.
Base sa imbestigasyon sa kapolisan sa Toledo City Police Station nga gipangulohan ni Police Lieutenant Colonel Dennis De Guzman giingong ang biktima naghakot kini ug tubig apan kalit lang nibaha gikan sa bukid ug nisugwak kini diha sa dalan.
Ang biktima kinsa padulong na unta kining mouli nitabok diha sa kanal apan nadala sa kusog nga bul-og sa tubig.
Ang kapolisan sa siyudad nagtuo nga napandol ang biktima ug naigo ang lawas niini ug ulo sa kanal dayon naanod ngadto sa usa ka gatos metros ang gilay-on.
Ang biktima dali nga gidala ngadto sa tambalanan apan gideklarar kini sa doktor nga patay na nga naabot sa tambalanan. —BDB (BANATNEWS)