CEBU, Philippines — Sobra usa ka milyon ang labaw ni Gobernadora Gwendolyn Garcia sa iyang kaatbang sa gubernatorial race sa probinsya sa Sugbo.
Gihulagway kini nga makasaysayanon nga kadaugan tungod kay mao kini ang unang higayon nga niabot sa sobra usa ka milyon ang boto nga nakuha sa usa ka gubernatorial candidate.
Base sa alas 4 nga partial ug official tally sa Commission on Elections (Comelec) Cebu Province, si Garcia nakakuha og 1, 439, 617 ka boto samtang ng iyang kontra nga si Ace Durano nakakuha og 337, 432 ka boto ug Nito Magnanao nga nakakuha og 9, 614.
Samtang sa vice gubernatorial race si incumbent Vice Governor Hilario “Junjun” Davide III mao gihapon ang nag-una pinaagi sa iyang 762, 417 ka boto. Gisundan ni Doc Tess Heyrosa nga nakakuha og 706, 298 ka boto ug John Enad nga 51, 941.
Pipila sa mga nakadaog nga kongresista bokal sa Probinsya sa Sugbo ang gipang proklamar na kagabii.
Apil na niini sila si 3rd district congressman - elect Pablo John “PJ” Garcia ; 5th district congressman - elect Duke Frasco; 6th district congresswoman -elect Daphne Lagon; 5th district board members - elect Red Duterte ug Michael Joseph Villamor; 1st district board member - elect Yolanda Daan ug Raul Bacaltos; 1st district- congresswoman elect - Rhea Gullas; 7th district board member- elect Sarsi Baricuatro ug sila 6th district board members - elect Glenn Anthony Soco ug Jude Thaddeo “Jonkie” Ouano.
Sa pagsulat niining balita, ang dakbayan sa Bogo na lang ang wala ka transmit sa ilang boto padulong sa Provincial Board of Canvassers. —IBM (BANATNEWS)