CEBU, Philippines — Gipangdakop sa National Bureau of Investigation Mandaue Field Unit ang 21 ka guwardiya gikan sa usa ka pribadong security agency tungod sa paglapas sa COMELEC gun ban samtang nagbantay sa usa ka pribadong lote diha sa Sitio Laray, Barangay Umapad, Dakbayan sa Mandaue, kagahapon (Lunes).
Si Arnel Pura, agent in-charge miingon nga nga walay napresentar nga Comelec gun ban certificate of exemption ang maong mga gwardiya samtang naghupot sa ilang mga armas.
“Naa tay napulo ka shotguns (nasakmit), onse ka revolvers, pipila niini nga mga armas defaced ang serial number, labi na kining mga shotguns,” matud ni Pura.
Ang ilang imbestigasyon nagsugod sa letter of complaint sa usa sa ka giingong usa sa mga tag-iya sa maong lote kinsa dunay tax declaration ug certificate of title.
Ang maong suwat nagkanayon nga sukad niadtong Enero nangabot ang maong mga gwardiya ug gidid-an sila makasulod.
“At 10 p.m in the evening, kay wala man ni sila diri guard kay confident man sila sa ilang claim diri kay naa man ni mga title, naay tax declarations, gisulod jud aning mga security guards.. so in short, naka take full control sila aning area,” sigon ni Pura.
Sukad niadto, si Pura nagkanayon nga kanunay na silang makadawat og reklamo gikan sa mga residente bisan kadtong molabay lang sa lugar tungod kay hulgaon sa maong mga gwardiya aron di sila mosulod.
“Especially after atong onslaught atong typhoon Odette, dili gani daw ipasulod ang construction materials para sa ilang balay,” matud ni Pura.
Bisan ang national highway nga gitrabaho sa DPWH duol sa lugar naapektahan kay dili paagion sa mga gwardiya ang mga trabahante sa maong ahensiya nga nagtrabaho sa maong highway.
Matod ni Pura nga dihang gipaabot na kanila ang letter of complaint gikan sa Department of Justice, nilusad dayon sila og surveillance aron makakuha og mga ebidensiya.
“Mao ning in coordination with the SWAT, with the LGU, was carried out the operation based atong pag possess and carry nila og firearms,” matud ni Pura.
Gisubay karon sa NBI kun kinsa ang nag-hire sa maong mga gwardiya kay matud pa dili kini maoy direktang niduol sa security agency aron kuhaon ilang serbisyo nga bantayan ang maong lote.— IBM (BANATNEWS)