CEBU, Philippines — Giaprobahan sa Senado niadtong Enero 17, 2022 ang balaudnon sa pag-establisar sa mga campus sa Cebu Technological University sa Lungsod sa Liloan ug Borbon sa Lalawigan sa Sugbo nga pagatawgon og CTU-Liloan Campus ug CTU-Borbon Campus.
Ang maong balaudnon gipangamahanan ni Kongresista Vincent Franco “Duke” Frasco ug gipaabot nalang nga pirmahan ni Presidente Rodrigo Duterte isip usa ka balaud. Ang pagbutang og unibersidad sa maong mga lungsod gitan-aw nga usa ka dakung kalamposan ni Frasco kinsa primero pa sa iyang termino.
Ang House Bill 4740 nga mao ang pagestablisar og mga unibersidad sa maong mga lungsod nga giduso ni Frasco niadtong Septiyembre 20,2019 maoy pagtuman sa iyang panaad nga prayoridad niini ang edukasyon.
Ang House Committee on Higher and Technical Education ug Appropriations niusa sa maong balaudnon isip Substitute House Bill 6877 nga gisuportahan sa Ubos Balay-Balauranan niadtong Hunyo 4, 2020 ug gipasaka ug nadawat sa Senado niadtong Hunyo 8, 2020.
Malampuson sab kini nadepensahan ni Frascog giaprobahan sa Senate Joint Committee on Higher, Technical, and Vocational Education, Committee on Ways and Means, ug Committee on Finance niadtong Pebrero 2, 2021.
Si Senador Joel Villanueva ang nangamahan sa balaudnon sa Senate Plenary niadtong Septiyembre 28, 2021 ug hingpit nga napasar niadtong Enero 17, 2022.
Ang pagtukod sa CTU standalone campus sa Liloan ug Borbon sa ikalimang distrito sa lalawigan sa Sugbo makatabang og daku sa pamilya sa mga tinun-an. Si Frasco aduna nay kapin sa 10,000 ka scholars alang sa tuig 2021-2022 gikan sa iyang distrito.—IBM (BANATNEWS)