CEBU, Philippines — Pagsaka sa mga kaso sa Covid-19 sa Cebu City karong bulana gilabwan pa ang tulo ka Covid-19 surges sa siyudad sa miaging tuig sumala pa sa Emergency Operations Center.
Si Konsehal Joel Garganera, pangulo sa EOC sa siyudad miingon nga paspas gyud ang pag-doble sa mga kaso sa siyudad karon.
Sigon pa niya sulod lang sa duha ka semana nalabwan niini ang kinadaghanang kaso nga natala sud lang sa usa ka adlaw sa tulo ka nangaging Covid-19 surges nga nahitabo sa Cebu City.
Dihang niigo ang Delta variant sa Sugbo sa miaging tuig ang pinakataas nga kaso nga natala naa lang sa 414, apan karon sa usa ka adlaw niabot na og 509 ka bag-ong kaso.
Misaka sab og maayo ang positivity rate karon sa siyudad nga niabot og 43 percent, layo kaayo og deperensiya sa limit nga gikonsiderar sa World Health Organization nga luwas.
“Ang ako lang gikuyawan kung ibase nato sa behavior sa tulo ka surges mo peak ra na siya after two months. So karon, kita two weeks pa gani na surpassed naman gani. But then again I was told by Dr. Bryan Lim nga dili pareha og behavior (ang Covid-19n variants) and after 4 to six week kuno, moubos na hopefully. Ang ako lang gyud dili lang ni siya molabi og saka kay maapektahan man sad atong panginabuhi,” kabalaka pang Garganera.
Matud ni Garganera, bisan tuod gikataho nga dili sama sa kabangis ang Omicron variants sa ubang Covid-19 variants gawas lang nga mas dali kini makatakod, delikado kaayo kini para sa mga wala magpabakuna.
Sa pagkakaron, dunay 17 ka pasyenteng na-admit sa COVID isolation facility sa Cebu City Medical Center. Ang 15 niini pulos dili bakunado.
Sagad sab sa mga naigo matod pa sa virus nag-edad og 21 anyos ngadto sa 30 anyos diin sagad niini adto nakuha sa ilahang trabahuan ilabi na kun magdungan og pangaon.
Giawhag ni Garganera ang ang mga trabahante nga kun mahimo likayan lang una ang panagtapok kun mokaon ug dili gyud mokompiyansa.
Hinuon bisan og misaka ang kaso sa COVID-19 sa siyudad wala pa mapuno ang mga Barangay Isolation Center ug Temporary Treatment Facility sa siyudad tungod kay kadto lang dunay gipamati ang ibutang ug kun mawala na ang sintomas hatagan dayon og clearance nga makagawas. “Ang atong TTMF upat lang na atong giablihan pero dili mapuno, why? grabe ang discharge mura sad og hospital. Sa una mangayo dayon sila og kaning ingon ta lugar sa TTMF pero matay after two days, three days mouli na sa balay. So kusog ang atong discharge mao na siyay nakamaayo in the same manner pud sa hospital mao sad sa BIC nato kusog pud ang ilang discharge pud,” asoy ni Garganera.
Sa 2,612 active cases sa Cebu City ang 80 porsyento niini dunay mild symptoms sa COVID, kadtong mga moderate to sever mao kining mga masakiton nang daan nga natakboyan og COVID.
Gikan sa pagsugod sa buwan sa Enero hantod kagahapon (Enero 18) tulo ang natala nga namatay tungod sa COVID base sa datos sa EOC Cebu City. —IBM (BANATNEWS)