Labella dili tipikal nga ‘boss’

CEBU, Philippines — Karong adlawa ihatod na sa iyahang katapusang pahulayan si Mayor Edgardo Labella dihia sa Golden Haven Memorial Park sa Barangay  Talamban, siyudad sa Sugbo.

Si Labella mipanaw niadtong Biyernes sa kaadlawon tungod sa septic shock secondary to pneumonia. Gihaya siya sa Crystal Palace sa Cosmopolitan Funeral Homes sa Barangay Lahug ug niadtong Miyerkules gidala ang patay’ng lawas niini sa Cebu City Hall alang sa public viewing aron paghatag og higayon sa mga Sugbuanon nga makasud-ong ug makapanamilit sa katapusang higayon sa mayor.

Si Cebu City Councilor Dave Tumulak miasoy sa dili pa ihatod si Labella sa lubnganan dunay  eulogy ang pagahimoon alas-8 sa buntag, pagka-alas 11 i-foot procession kini sa mga sakop sa Philippine Navy paingon sa Cebu Metropolitan Cathedral alang sa misa requiem niini nga pangunahan ni Cebu Archbishop Jose Palma.

Dayon inig 1:30 dad-on ang iyang lawas sa a Golden Haven Memorial Park kun diin siya ilubong.

Ang funeral convoy anha moagi sa P. Gomez Street, D. Jakosalem Street, Colon Street, Osmeña Boulevard, Fuente Osmeña Circle, N. Escario Street, Archbishop Reyes Avenue, Governor M. Cuenco Avenue, Talamban Road, Miramonte Riverdale Road dayon Golden Haven Memorial Park.

Matod ni Tumulak ang mga dalan nga maagian sa convoy sirad-an kadali ug kun makalabang na ang convoy ablihan ra usab dayon.

Ang convoy moagi sa Police Regional Office(PRO)-7 tungod kay ang kapulisan mohatag og hamubong tribute sa mayor.

Way kaparehas

Ang mga nakauban ug nakaila personal ni Labella mihulagway kaniya nga dili tipikal nga “boss.” Dili siya kadtong lider nga kusog momando o mo-deman sa mga sakop kondili ipaagi niya kini og pamarayeg mao nga kadtong matungnan dili makabalibad.

Ang pangulo sa Prevention Restoration Order Beautification and Enhancement (PROBE) nga si Raquel Arce miingon nga gisuportahan sa mayor ang mga kalihokan sa ilang buhatan, ang PROBE maoy gitahasan sa paghawan sa mga kadalanan aron dili makamugna og traffic ug mga tawong mogamit sa karsada.

Ang pangulo sab sa Cebu City Market Operations Division nga si Irvin Cabales miingon nga buotan si Labella ug sama ni Arce, dili kini manugo kondili mamarayeg ug mamalihug kun duna kini ipabuhat sama sa usa ka amahan.

"Dili siya magpakita nga usa siya ka boss, kun duna siyay sugo , kay pamarayeg gyud ang iyang paagi . Grabe ka mapaubsanon," matud pa ni Cabales.

Samtang ang manager sa Cebu City Sports Center nga si Jundel Bontuyan miingon nga si Labella usa ka tawo nga dili gusto og gubot.

"Kun  dunay manaot niya , moana ra na si mayor nga 'sagdi lang na dong' , ayaw lang na panumbalinga , padayon lang ‘ta sa pagtrabaho," pagkahinumdom pa niya sa mayor.— Rowena Capistrano/IBM (BANATNEWS)