CEBU, Philippines — Nunot sa pagkunhod na sa mga bag-ong kao sa Covid-19 ug niluagan na ang mga restriksyon aron makabangon ang ekonomiya sa Dakbayan sa Sugbu gitinguha karon nga ablihan og balik alang sa mga pasaheroan ang Carbon Public Market.
Ang hepe sa Cebu City Market Operations Division nga si Irvin Cabales nga niduso na kini og sugyot sa kadagkoan sa city hall alang sa maong tinguha. Dul-an duha ka tuig ng wala pasudli og pasaheroan ang maong merkado nga kabahin sa gipatumang restriksyon tungod sa pandemiya.
Una na nga gimando ni Mayor Michael Rama ang pagpatangtang sa mga railings sa kadalanan alang sa kaluwasan sa mga motorista, lakip niini ang mga railings diha sa maong merkado.
Sumala pang Cabales tungod sa pagtangtang sa mga railings miluag na ang mga dalan sa maong merkado, apan kinahanglang pa nilang makigsabot sa Cebu City Transportation Office (CCTO) ug Prevention Restoration Order Beautification and Enhancement (PROBE) aron mahapsay ang plano. —IBM (BANATNEWS)