CEBU, Philippines — Human nitak-op ang iyang appointment isip coterminous nga empleyado sa city hall gibutyag ni Jundel Bontuyan, manager sa Cebu City Sports Center nga gipaandam na niya daan ang pasilidad alang sa subling pagbukas sa regular nga operasyon niini sa sunod buwan.
Sa pagkakaron nagpaabot nalang si Bontuyan sa advice ni Mayor Michael Rama sa desisyon niini sa iyang pagdumala sa CCSC.
Matud ni Bontuyan nga dako niyang kalipay kun ipabilin siya ni Rama sa paghupot sa maong pasilidad ilabi na nga lisod ang pagpangita og trabaho karong panahona.
"Karon naghuwat nalang ko og unsay plano ni Mayor Mike Rama o kinsay iyang ipuli nako diri sa Cebu City Sport Center. Kong iya kong i-reappointment modawat ra gyud ko ug akong ikalipay kay prangka nga istorya lisod ug pagpangita og trabaho karon.
Pero og dili man gani, ako kanang dawaton sa walay kusmod ug walay kahiubos”, matud ni Bontuyan.
Karong Disyembre 16, 2021 ang plano sa kagamhanan sa Dakbayan sa Sugbo sa subling pagbukas sa nahisgutang pasilidad.
Nasayran nga ang CCSC gisirado kini niadtong buwan sa Agosto niining tuiga tungod kay gihimo kining isolation facility human nga napuno ang mga isolation facility sa siyudad dihang nisaka pag-ayo ang kaso sa COVID-19.
Matud ni Bontuyan nga gamay nalang ang nahibilin nga mga pasyente sa isolation facility ug sigurado nga mabalik ang regular nga operasyon sa CCSC sa sunod buwan. —BDB (BANATNEWS)