CEBU, Philippines — Moabot P20 milyones kapin nga kantidad sa ginadili nga drugas ang nasakmit sa managlahing operasyon sa mga tinugyanan sa kapulisan ug Philippine Drug Enforcement Agency Central Visayas sa nakalabay nga duha ka adlaw.
Sa gipahigayon nga Synchronized Enhanced Managing Police Operations niadtong adlaw nga Sabado nasakmit sa mga otoridad ang kapin P13 milyones nga balor sa ginadiling drugas ug 679 ka mga tawo ang nasikop.
Si Police Brigadier General Roquq Eduardo Vega, Police Regional Office Director nitug-an nga ang Central Visayas malampusong nakasakmit og dul-an sa duha ka kilong shabu ug marijuana gikan sa 150 ka mga drug personalities, subay sa 128 ka mga operations nga gihimo. Nagpasalamat ni Vega sa aktibong pagtabang sa komunidad nga maoy naghatag og impormasyon bahin sa mga illegal nga kalihukan diha sa ilang mga dapit.
Gawas sa mga nadakpan tungod sa ilegal nga drugas 296 sab ka mga tawong nagsugal ang nadakpan gikan sa gilusad nga 122 ka mga anti- illegal gambling operations.
Samtang 23 usab ka mga tawo ang nadakpan sa 198 ka operasyon batok sa ilegal nga armas nga niresulta sa pagkasakmit sa 223 ka mga loose firearms.
Samtang ang mga tinugyanan sa PDEA Bohol Provincial Police Office uban ang RPDEU-7 ug Dauis Police Station nihimo usab ug buy-bust operation sa Sitio Cansumanay, Barangay Tabalong, Lungsod sa Dauis niadtong adlaw nga Lunes ug nadakpan sila si Gina Dano, 36, target sa operasyon ug si Jonas Julapong, 42.
Nasakmit gikan kanila ang 12 ka putos sa gituohang shabu nga motimbang ug pito ka gramo, buy bust money ug kagamitan sa pagsuyop.
Sa laing operasyon kagahapong adlawa, P7.5 milyones nga balor nga gituohang shabu ang nasakmit sa mga sakop sa City Intelligence Unit sa Lapu-Lapu Police Office ( CIU LLCPO) pinangulohan ni Police Major Joey Bicoy diha sa Sitio Soong 2,Barangay Mactan sa Siyudad sa Lapu-Lapu.
Ang nadakpan mao si Philip B. Abellar alyas “ Cholo” 36, nga usa ka High Value Individual Regional Level nga taga Barangay Pasil sa Siyudad sa Sugbo.
Matud pa ni Bicoy nga hapit usa ka bulan nilang gi monitor ang kalihokan ni Abellar ug nasuta nga mao kini ang tighatod og illegal nga drugas diha sa Lapu-Lapu City.
Nakuha gikan kaniya ang usa ka kilo og usa ka gatos gramong gidudahang shabu.
Kasong kalapasan sa Sec 5 Sec 11 Art ll RA 9165 kung pag hupot og pag pamaligya og ginadling drugas ang ipasaka nga kaso batok ni Abellar. –Romeo Marantal/IBM (BANATNEWS)