CEBU, Philippines — Nagpadala og request ang Siyudad sa Sugbo ngadto sa Inter-Agency Task Force (IATF) aron tugotan sila nga buksan ang mga sam-ang sa siyudad gikan sa Oktubre 29 hangtud sa Nobiyembre 2 subay na sa pag-obserbar sa kalag-kalag.
Ang IATF nagpagawas og kamanduan nga pasirad-an ang mga sam-ang lukop nasud sa maong mga petsaha tungod kay sa hulga sa coronavirus disease (COVID)-2019.
Sa suwat ni acting mayor Michael Rama ngadto sa IATF kini miingon nga ang Cebu City gipaubos sa alert level 2 ug padayon sab nga mikubos ang kaso sa COVID sa dakbayan.
Naa sab sa suwat nga sa sayong bahin pa lang sa buwan sa Septiyembre gipangandaman na kini sa siyudad. Giklaro ni Rama nga dili kini pagsupak sa kamanduan sa IATF.
“I was talking to Secretary Año last night, I had an interaction with him and I do not want anymore delivering because it’s already been stated in my letter once again,” sigon ni Rama.
Kagahapong adlawa, sila si Rama uban ni Cebu City Police Office Director Colonel Josefino Ligan nag-inspeksiyon sa mga sam-ang sa siyudad.
Si Ligan sa iyang bahin miasoy nga paigo ra ang security forces nga gipakatap sa mga sam-ang kay gawas PNP dunay say mga personnel sa AFP, PROBE ug CCTO nga motabang.
Moapelar sab
Samtang ang Dakbayan sa Lapu-Lapu, moapelar sab sa IATF nga ablihan sa publiko ang mga sementeryo sa Oktobre 29 ug 30, 2021aron makabisita ang mga tawo sa mga minahal sa kinabuhi nga nitaliwan na. Apan daan nang miluwat og executive order si Mayor Junard Chan nga sirad-an ang mga sam-ang sa Oktobre 31 hangtod sa Nobyembre 2, 2021.
“Kay ang gimando man sa IATF nga isirado ang menteryo October 29 to November 2. Pero kami nakapagawas naman mi ug executive order nga October 31, November 1 and 2 lang sarado ang mga menteryo,” nagkanayon si Atty Misaellee Tejano, executive secretary ni Chan.
Si Tejano miingon nga ilang gipaniguro ngadto sa IATF-MEID nga ilang han-ayon ang eskedyul sa mga adlaw sa pagbisita sa mga tawo aron masunod ang minimum health protocols.
Tugotan ang minors
Tugotan sa lungsod sa Balamban ang mga minor de edad ug mga senior citizen nga makasulod sa sementeryo hangtod Oktubre 28 lamang.
Pagsunod kini sa lungsod sa kamandoan sa IATF nga sirad-an ang mga sementeryo sa Oktubre 29 hantod Nobyemre 2, 2021.
Modawat ra hinoon og mga lubong ang mga pampubliko ug pribadong menteryo sa lungsod sa atol sa maong mga adlaw.
Ang mga adunay comorbidities ug kadtong mga mabdos ang giawhag nga dili nalang paadtuon sa mga sementeryo alang sa ilang kaluwasan tungod sa pandemya sa Covid-19.
Ang mga pribadong sementeryo ug memorial parks giawhag usa nga mohimo sa kaugalinong sistema sa scheduling aron nga malikayan ang panagtapok.
Giawhag usab ang tanan nga mosunod gihapon sa minimum health standards.— Romeo Limpangog, Le Phyllis F. Antojado/IBM (BANATNEWS)