CEBU, Philippines — Si Cebu City Administrator Atty. Floro Casas Jr. nagkanayon nga mao ra gihapon ang sitwasyon karon ni Cebu City Mayor Edgardo Labella, dili pa gyud kini 100 porsyento nga haom nga mobalik sa trabaho. Sayo pa, si Labella nag-indefinite leave kini sugod niadtong Oktubre 8, 2021ug matud ni Casas nga “on and off” ang pneumonia ni Labella hinungdan nga nagpadayon ang iyahang treatment ug pagpahuway karon.
“Since katong last hospitalization wala na gyud siya mabalik sa hospital naa ra gyud siya sa balay from time to time mobisita niya iyahang doctor to check”, matud ni Casas.
Nasayran nga wala pa gi-advise si Labella sa iyahang doctor nga motrabaho ug gani mismo ang doctor niini ang nitambag ni kaniya nga dili na modagan sa umaabot nga piniliay.
Nasayran usab nga ikapitong higayon karong tuiga nga si Labella ni-leave sa katungdanan.
Ang unang leave niini nahitabo niadtong buwan sa Enero tungod sa ear infection, niadtong Mayo 31 nag-medical leave usab kini human nalandig sa tambalanan tungod sa “slight pneumonia”.
Niadtong Hunyo 9, 2021, laing tulo ka semana nga medical leave ang gi-file ni Labella aron maka-focus sa pagpaalim sa sakit nga gihambin diin usa na niini ang sepsis o blood infection; ang ika-upat nga leave nahitabo niadtong Hulyo 14, 2021 gumikan sa sagunson nga ubo; ika-lima nga leave nahitabo pagka-Septiyember 2 hangtud sa 7, 2021 ug ang ang ika-unom nga leave niadtong Septiyember 20 hangtud sa Oktubre 7 niining tuiga. —BDB (BANATNEWS)