CEBU, Philippines — Nasikop ang 20-anyos nga giingong high value target atol sa gipahigayong buy-bust operation sa Philippine Drug Enforcement Agency-7 niadtong Lunes sa hapon diha sa E. Sabellano Street, Barangay kinsang-an Pardo, Dakbayan sa Sugbo.
Ang suspetsado mao si Cleiford Go, walay trabaho, taga Sitio Central, Barangay Bulacao, Dakbayan sa Talisay.
Nasakmit gikan sa suspetsado ang duha ka pakete nga shabu nga nitimbang og 50 gramos ug nibalor tanan ngadto sa P340 mil, buy bust money ug usa ka motorsiklo.
Matud ni Leia Albiar-Alcantara, tigpamaba sa PDEA-7 nga base sa ilang nadawat nga report giingong ang suspetsado makadispatsar kini og 200 ngadto sa 300 ka gramong shabu matag semana.
Sa laing bahin, gihatagan og pasidungog sa kapolisan ug PDEA ang duha ka barangay sa Dakbayan sa Lapu-Lapu tungod sa kalamposan sa ilang kampaniya batok sa ilegal nga drugas.
Si Mayor Junard “Ahong” Chan pinaagi sa buhatan sa City of Lapu-Lapu Office of Substance Abuse Prevention (CLOSAP) nga gipangulohan ni Gary Lao nitugyan usab sa P50,000 nga tseke ngadto sa gipasidunggan nga barangay nga gilangkuban sa Baring ug Tingo sa Isla sa Olango, Dakbayan sa Lapu-Lapu.
Gipakita sa maong duha ka barangay sa Isla sa Olango ang ilang kampaniya pinaagi sa clearing nga gihimo batok sa ilegal nga drugas
Gitugyan usab ni Lao ang P100,000 nga tseke isip pinansiyal reward ngadto sa Lapu-Lapu City Police Office (LCPO) nga gipangulohan ni Police Colonel Arnel Banzon gumikan sa malampuson nilang anti-drug operation.
Si Banzon nagkanayon nga ang kalamposan sa ilang operasyon gumikan usab kini sa tabang sa katawhan.
“Ang katawhan, ang barangay, kapolisan, ug ang PDEA nagtinabangay aron mamahimong drug-free ang Baring ug Tingo”, ni Banzon pa.
Si Jonah Pino, pangulo sa Department of Interior and Local Government sa siyudad nagkanayon nga ang kalamposan natigayon pinaagi sa collaborative effort sa national government, local government ug mga barangay.
Gitunol ni Chan ang tseke ngadto kang Kapitan Romulo Wagwag sa Baring ug Kapitan Audie Flores sa Tingo ug gihatag usab ngadto kanila ni Chan ang certificate of recognition sa PDEA sa ilang exemplary work and performance of duty hinungdan nga nahimong drug cleared ang maong mga barangay. —Romeo T. Limpangog/BDB (BANATNEWS)