CEBU, Philippines — Upat ka construction worker nga nagtrabaho sa usa sa mga construction site diha sa Barangay Lahug, Dakbayan sa Sugbo ug padulong na unta nga mouli ngadto sa Negros Oriental ang positibo sa COVID-19.
Matud ni Erwin Gamallo, miyembro sa COVID-19 task force sa Lungsod sa Samboan nga ang upat ka construction worker padulong unta kining mosakay na og barko apan sa pagsusi sa personnel sa coast guard sa ilang swab test result positibo kini sa virus. Ang maong mga trabahante niabot sa pantalan sa Samboan niadtong Martes sa hapon.
Ang maong mga trabahante nibiyahe kini paingon sa Lungsod sa Samboan sakay sa Rough Rider bus.
Gitawagan sa mga personnel sa Lungsod sa Samboan ang opisyales sa Negros Oriental apan dili kini nila dawaton tungod kay positibo sila sa COVID-19.
Ang maong construction workers gi-isolate kini sa mga isolation center sa Dakbayan sa Sugbo.
Sa laing bahin, Si Irvin Cabales, market administrator nagkanayon nga walay kausaban nga ipatuman diha sa Carbon Public Market apan gipahugtan lang nila ang pagpatuman sa basic health protocols. Kanunayon na usab nila ang ilang rekorida nga magpahinumdom sa mga tawo nga motuman sa safety protocols ug i-monitor usab nila ang bul-og sa tawo nga mosulod sa maong merkado.
Manghatag usab sila og facemask ug kada stall i-require nila nga magbutang og alcohol aron pang-disinfect ug ang vendors na maoy mopatuman sa social distancing sa ilang mga pwesto. Dili usab ibalik sa Market Operations Division (MOD) ang ilang gibuhat kaniadto nga i-schedule ang mga tawo nga mosulod sa maong merkado.
Samtang si Konsehal Joel Garganera, hepe sa Cebu City Emergency Operations Center nibutyag nga mas paspas karon ang pag-contain ug pagresponde sa sitwasyon sa COVID-19 sa siyudad.
Matud ni Garganera nga dili molapas sa 24 oras makuha na dayon ang resulta sa ilang gipang-swab test ilabi na kadtong gipaubos sa contact tracing kompara kaniadto nga molanat pa og pipila ka adlaw ang pagpaabot sa resulta. Ang samples dili na kini dalhon ngadto sa kaulohan dinhi na lang kini sa Sugbo ang pagkuha sa resulta. —Decemay P. Padilla, Sanden J. Anadia/BDB (BANATNEWS)