CEBU, Philippines — Usa ang patay ug unom ang gidala sa tambalanan sa panagbangga sa usa ka motor ug usa ka sakyanan didto sa Sitio Banban, Baranggay Pandacan, Pinamungajan, Cebu niadtong Domingo sa gabii.
Ang namatay mao ang driver sa Honda Wave 100 nga motor nga si Glecedo Piala Cuizon, 47 anyos residente sa Purok Avocado, Brgy. Pandacan, Pinamungajan, Cebu.
Ang driver usab sa Toyota Hi-Lux giila nga si Joseph Lucerna, 51 anyos, ug mga sakay niini nga sila si Theresa Lucerna, 52 anyos, Mary Mae Lucerna, 24 anyos, Nenalyn Moreno, 30 anyos ug Christian Moreno 30 anyos nga parehong taga Tungkop, Minglanilla, Cebu.
Base sa imbestigasyon sa kapolisan nasuta nga kusog ang padagan ni Lucerna sa iyang sakyanan ug nawad-an og kontrol sa iyang manobela hinungdan nga didto mapunta sa pikas nga lane. Nasayran usab nga ni- overtake ug usa ka sakyanan si Lucerna hinungdan nga mibanga kini sa motor nga gimaneho ni Cuizon ug milahos ang sakyanan sa punuan sa lubi ug ngadto sa usa ka balay.
Ang tag-iya sa balay nga naapektuhan mao si Warren Delarmente, 48 anyos residente sa nahisgutang barangay.
Si Cuizon nalagpot sa kilid sa dalan, samtang si Lucerna ug ang mga sakay niini napiit sa sakyanan ug nanga-angol. Daling gidala sa tambalanan ang mga biktima apan si Cuizon gideklarar nga dead on arrival.
Sa gihimong pag-eksamin nasuta nga naka-inom si Lucerna kinsa giingong gikan nga namista sa Sitio Baybay, Baranggay Pandacan. —MEL (BANATNEWS)