CEBU, Philippines — Gipahinumdoman ang mga drayber sa traysikad ug e-bike sa Barangay Bulacao, Dakbayan sa Talisay nga likayan ang pagbiyahe diha sa national highway aron dili sila madakpan ug makabayad og multa.
Si Police Lieutenant Noel Lungcob nitambong sa tigom sa mga drayber aron hisgotan ang gipangdili sa disicipline zone.
Gilakip usab niya ang ilang pagbiyahe sa highway nga gidili sa balaod tungod kay delikado kini sa ilang kaugalingon lakip na sa ilang mga pasahero.
Ug iyang giawhag ang mga drayber nga motuman sa mga lagda sa balaod.
Gawas niini, gihangyo usab ni Lungcob ang mga drayber nga motaho ngadto kanila kong aduna kini nahibaw-an nga padayong nalambigit sa ginadiling drugas.
Sa laing bahin, ang kapolisan sa Lungsod sa Minglanilla nipahigayon usab og samang kalihokan sa pag-umol og grupo sa mga drayber sa traysikol.
Ang kapolisan sa lungsod nihangyo sa mga drayber sa pakigbatok sa insurgency ug ilegal nga drugas. BDB (BANATNEWS)