CEBU, Philippines — Mokabat lang sa 10 gikan sa kinatibuk-ang 1,500 ka mga sakyanan nga na-impound sa Dakbayan sa Mandaue ang gikuha sa mga tag-iya.
Kini taliwa sa paghatag og amnestiya sa kagamhanan sa dakbayan sa mga tag-iya og sakyanan nga nagsugod niadtong Mayo 2, 2021.
Suma pa ni Arnold Malig-on pangu sa Traffic Enforcement Agency of Mandaue (TEAM) nga maoy gitahasan sa pagproseso sa mga dokumento nga sukad pa niadtong tuig 2015 hangtod sa tuig 2021 ang maong mga na-impound nga mga sakyanan.
Gidugang ni Malig-ong nga mahimong kuhaon sa mga tag-iya ang na-impound nilang sakyanan nunot usab sa gibasehan nga ordinansa nga naghatag og diskuwento sa ilang balayranan sa storage fee. Gikan sa tuig 2015 ngadto sa 2020 maoy na-impound ang 1,300 ka mga motorsiklo, 160 ang tricycle, ug 12 usab ang mga awto.
Base sa gipatuman nga ordinansa, ang gihatagan og diskuwento ubos sa amnestiya mao lamang ang storage fee ug walay labot ang balayranan sa kalapasan sa mga lagda sa trapiko. —MEL (BANATNEWS)