CEBU, Philippines — Ang Cebu City Vaccination Operations Center nagtinguhang karong semanaha mahatag na ang ikaduhang dose sa mga unang nagpabakuna batok sa Covid-19 sa duha ka mga vaccination sites niini matud pa ni konsehal Dave Tumulak.
Gipahinumdoman ni Tumulak ang tanang magpabakuna sa ikaduhang dose nga dad-on ilang vaccination card, ID ug magsuot gyud og face maskug face shields.
Ang schedule sa pagbakuna sa ikaduhang dose makita diha sa ilang vaccination cards. Karong adlawa, 256 ang gikatakdang bakunahan sa ilang ikaduhang dose sa Sinovac sa UC Banilad ug 454 sa Robinson’s Galleria.
Ugma, 237 na sab sa Robinson’s Galleria.
Sa Miyerkules doblehon ang pagpamakuna sanglit holiday man sa adlaw nga Huwebes. Anang adlawa 530 ang bakunahan sa UC Banilad ug 524 sa Robinson’s Galleria.
Sa sunod semana, adunay upat ka adlaw sab ang gitakda para sa ikaduhang dose maong duha ka mga vaccination center.
Samtang sa Mayo 23 hangtod 26 ug 28 ug 30, kadtong mga nabakunahan sa AstraZeneca mao na sab ang hatagan sa ikaduha nga shot diha sa UC Banilad ug Robinson’s Galleria.
Ang sa SM Seaside City, gikatakdang buhaton ang ikaduhang dose sa Sinovac sa Mayo 23 ug 24.
Kaniadtong Mayo 5, adunay 105 ka mga indibidwal nga nakakuha na sa ikaduhang dosis sa Sinovac sa Cebu City.
Alang sa mga wala pa nagparehistro alang sa pagbakuna sa Cebu City mahimo silang magpalista sa PaBakunaTa.com. —IBM (BANATNEWS)