OFWs, mamauli sa Cebu City di na usban og RT-PCR Test
Cebu, Philippines — Gipadayag ni Cebu City Mayor Edgardo Labella nga dili na kinahanglan nga mopaubos og mandatory quarantine ang mga gipapauli na nga Overseas Filipino Workers (OFW) ug Non-OFW nga mobiyahe padulong sa siyudad kun sila negatibo nang daan sa RT-PCR Test kun diin sila gikan.
Si Labella miingon nga parehas sila og pagtan-aw ni Gobernador Gwendolyn Garcia kalabot sa maong butang nga dili na kinahanglang lisud-lisoron pa ang mga mamauling Sugboanon. Gihan-ay na ni Labella ang pormal nga kamandoan kalabot niini. Kaniadto ang mga Sugboanong mamauli gikinahanglang pa gihapong magpaubos sa RT-PCR test ug ipaubos sa 14 ka adlaw nga quarantine ug kinahanglang nga usban sila og swab test aron pagsigurong negatibo sila sa Covid-19.
Matud pa sa mayor naghinam-hinam na ang OFW’s u gang mga Sugboanong gikan sa laing probinsya nga makabalik sa ilang yutang natawhan busa dili angayan i-quarantine kun negatibo na silang daan sa RT-PCR test.
Alang sa mga nagpositibo sa COVID19 nga OFW’s, andam ang siyudad sa pagpahimutang kanila sa barangay isolation centers ug sa NOAH Complex.
Apan kun duna silay mild symptoms, duna pud silay giandam nga Cebu City Quarantine Center (CCQC).
Kun severe ang kahimtang sa pasyente , dalhon na gyud kini og mga tambalanan.
Nasayran nga samtang nagpaabot sa resulta ang OFW’s, kasamtangan kini nga mag-istar sa hotel nga accredited sa Department of Tourism (DOT) ug sa Department of Health.( BANAT NEWS)
- Latest
