CEBU, Philippines — Mibalik na sa iyang trabaho si Mandaue City Mayor Jonas Cortes niadtong Martes, Abril 20, 2021, human sa duha ka semana nga pagpaubos sa self- isolation dihang nagpositibo sa coronavirus disease.
Gipasalamatan sa mayor ang iyang pamilya ug mga higala sa ilang pag-ampo alang sa iyang recovery.
Matud pa niya nga nakasinati siya sa pagkawagtang sa pagtagamtam ug ang pagpanimaho nga maoy sintoma sa COVID 19. Dihang gi-swab test siya nagpositibo ang resulta niadtong Abril 15, 2021.
Hinuon ang tanan niyang close contact pulos nagnegatibo ang resulta sa swab test.
Giasoy sa mayor ang iyang kasinatian dihang nipaubos sa isolation nga matud pa niya nga kanunay lang siya nga nagtan-aw og balita sa telebisyon, pagbasa og newspaper ingon man ang pag-exercise aron pagwagtang sa iyang gibati nga kalaay.
Gidasig sa mayor ang mga pamilya nga adunay sakop nga nagpaubos sa isolation sa pagsusi gayod matag karon ug unya sa ilang kahimtang sa panglawas.
"sa atong mga kaigsoonan no, akong usbon, kana bitaw ma isolate ta grabehang lisora gyud. Ma experience nimo, anxiety tanan nga kalisod nga wala kay tawo (kuyog), so please keep in touch, tawaga, pangamustaha matag adlaw niya give your all out support, your prayers mao nay labing nindot. Ang kanang pagpangamusta dako na kaayo na, it means a lot sa mga patient nga na isolate because of COVID-19,” nagkanayon si Mayor Cortes. —MEL (BANATNEWS)